WILLEMSTAD - Kòrsou por bien lubidá e asuntu di preis preferenshal pa petroli. Presidente di Venezuela a yega di bisa ku miéntras tin un base militar merikano na Kòrsou, no tin kuestion di preis preferenshal. Ta kiko Kòrsou ke, krudo barata pa traha kombustibel pa mañan bombardiá mi mes kuné? Loke nos mester a hasi ta probechá di e oferta ku Cuba a hasi nos.
Esei ta alegashon di miembro di Konseho Insular Nelson Pierre den su intervenshon durante e reunion públiko pa atendé e krísis energétiko ku ta afektando nos pais tambe seriamente.
Partidonan di oposishon – ku ta esnan ku a pidi e reunion – tabata ke sa kiko gobièrnu ta bai hasi pa aliviá pueblo di e oumento konstante ku nos pais a bin ta konosé di preis di energia.
“E problema”, asina kasi tur miembro di Konseho Insular a menshoná, “ta un problema ku karakter internashonal, pero mester tin medida ku por tuma pa en todo kaso trese alivio riba término kòrtiku pa komunidat. E reunion tabatin komo tema sentral e oumento di preis di energia den nos pais”.
Den su disertashon, Nelson Pierre a mustra, ku preis di petroli ta vulnerabel na e kosnan ku kisas ménos hende ta pensa. El a referí na desaroyonan ku ta tumando lugá na Venezuela, Ecuador, Paraguay, Bolivia, Argentina i Brazil pa ilustrá kon sensitivo preis di petroli ta riba merkado mundial.
Un di e kosnan ku a bin dilanti durante e reunion tabata e trabou ku e Komishon di Energia a hasi. Manera tabata konosí kaba, hopi ta konsiderá ku e rekomendashonnan ku e komishon a produsí no ta representá un alternativa berdadero.
Hopi miembro tabatin krítika fuerte riba e komishon, bisando ku el a defroudá kompleto. Nelson Pierre a referí na loke e representante di gobièrnu den e komishon a bisa, esta ku gobièrnu no ta primintí di wanta preis, pero si trese alivio pa pueblo, partikularmente esnan di ménos rekurso.
Un dje rekomendashonnan di e komishon por sierto ta pa forma un delegashon pa bai Venezuela pa hiba deliberashon ku gobièrnu venezolano pa haña un preis preferenshal di krudo pa asina aliviá e doló ku hopi hende ta pasando aden awor aki.
Pierre sinembargo a rekomendá gobièrnu pa no bai pèrdè su tempu.
“Presidente Hugo Chávez di Venezuela a yega di bisa: miéntras ku tin un base militar riba teritorio antiano, no bin papia mes di preis preferenshal di krudo. Ta kiko boso ta fèrwaktu, pa mi bai di akuerdo pa mañan usa e kombustibel ei pa bombardiá mi mes?” tabata palabranan di Pierre.
Pierre a bisa ku na 2006, tempu e tabata diputado, gobièrnu di Cuba a ofresé pa yuda nos pais ku un maneho energétiko.
“Anto por nada. Kompletamente grátis. Cuba ta e pais number unu na mundu ku sa kon atendé ku maneho di energia,” e lider di Niun Paso Atras a agregá.
Manera ta konosí diputado Humphrey Davelaar a pidi tempu pa e prepará su kontestanan riba e preguntanan ku a bin durante e reunion públiko aki.
Presidente di Konseho Insular mr. Lizanne Dindial a posponé e reunion te djaluna awor dia 5 di mei pa 9or di mainta.