WILLEMSTAD – “Kòrsou mester kuminsá pensa seriamente pa kana su kaminda di kambio estatal, los for di St. Maarten.
Si unabes St. Maarten ta parse di no ke aseptá kondishonnan ku Ulanda ta imponiendo den kuadro di e supervishon finansiero, nos ta pèrdiendo tempu balioso”. Esei, tantu diputado di Struktura Estatal Zita Jesus-Leito i diputado di Finansa Mike Willem a enfatisá.
E trayekto estatal manera ya ta ampliamente konosí, no ta kanando segun deseo di hopi hende. E trabounan ku mester hasi ta hopi, pero aparte di esei, tin hende ta preokupá pa e rumbo ku e desaroyo ta bai.
Kòrsou i St. Maarten, tur dos islanan ku den futuro lo haña e status di pais outónomo den Reino, lo bai traha huntu riba diferente tereno.
No ta tur hende, ta mes kontentu ku e desaroyo aki.
Por a tende ku sierto insistensia, ku e desaroyo aki, impulsá pa un gran parti pa Ulanda, lo kondená e dos islanan aki atrobe na otro, siendo ku ta hustamente mas outonomia Kòrsou ta deseá.
Un di e áreanan ku Kòrsou i St. Maarten lo mester bai traha huntu, ta e idea di un solo banko sentral pa tur dos isla.
Mester bisa, ku no tabatin masha progreso den e deliberashonnan te ku awor entre St. Maarten i Kòrsou, loke por sierto a pone diputado di Struktura Estatal Sarah Wescot-Williams kuestioná tambe e futuro koperashon aki. St. Maarten asta ta dispuesto kaba pa bai riba su mes, adoptando dollar komo su moneda di pago ofishal.
“Si den e dianan benidero nos no logra haña otro, mi tambe ta kere ku e mihó kos ta pa nos sigui kana riba nos mes, pa nos por finalisá nos trabounan”, di akuerdo ku diputado Zita Jesus-Leito.
Por sierto ku Partido Nashonal algun dia pasá tambe a ekspresá su mes den e direkshon aki.
“Kòrsou mester bai riba su mes. Mi ta kere ku nos lo funshoná muchu mas efisiente i rápido”, parlamentario alabes presidente di Partido Nashonal di Pueblo mr. Faroe Metry a deklará.
Metry a bisa den esaki, den kuadro di un reflekshon riba e selebrashon próksimo di 60 aña di eksistensia di su partido.
Segun Faroe Metry, lo ta bon pa Kòrsou kuminsá kana e trayekto estatal aktual riba su mes, los for di St. Maarten.
“No ta tur hende por kana mes rápido. Kòrsou mester haña su mes kaminda,” Metry a afirmá.
Por sierto ku Metry a anunsiá ku su partido ta keda para riba e fecha di 15 di desèmber 2008, komo fecha riba kua e kambionan estatal mester bira un hecho. “Nos ta bon konsiente si, ku mester traha duru pa logra e fecha aki”, asina Metry a bisa mesora.
Manera ta ampliamente konosí, Ank Bijleveld sekretario di Estado pa Relashon den Reino a anunsiá, ku e no ta weta e fecha aki komo algu faktibel mas, mirando e kantidat di trabou ku ainda mester tuma lugá. Bijleveld, durante su enkuentro ku parlamentu ulandes e siman aki a enfatisá ku e ta weta e trayekto aki difísil i ku e ta kere mas bien mester papia di mas ku seis luna, pa e trabounan tuma lugá.
Pero, pa Metry, e ekspreshonnan di Bijleveld den e sentido aki ta ekspreshonnan ku el a hasi riba su mes.
Pa loke ta e aspekto di repartishon di bienes, e presidente di Partido Nashonal di Pueblo ta kere ku nos por hasi bon uso di e eksperensia di Aruba. Ounke, asina el a bisa den mesun rosea, e situashon no ta mesun kos i no ta komparabel kompletamente.
Por sierto ku Aruba tambe a kere ku e lo kaba ku e repartishon di propiedat aki den 5 aña di tempu, pero esei a tuma muchu mas tantu tempu. Di tur manera, asina Metry a konkluí, Partido Nashonal lo sòru pa pueblo di Kòrsou haña loke e mester haña.