Tratando na haci un balansa di welga
Jiunan a wordo perhudica severamente

ORANJESTAD- Gobierno di MEP ta mustra den un comunicado di prensa, cu den e balansa cu gobierno di MEP a haci relaciona cu e welga di trahadornan publico, ta uno negativo pa loke ta trata educacion aki na Aruba.
“Awor cu tin un grupo di maestro liga cu AVP, RED y MPA a huelga mas cu 5 siman largo lagando nos yiunan sin por a haña les, a yega e momento pa traha un balanza. Cu nos enseñansa tabata tin resultadonan cu ta laga di desea tabata conoci caba, unda anualmente un gran cantidad di mucha ta keda sinta, no ta slaag, ta kita for di school etc., unda tur e placa cu gobierno y e mayornan a hinca aden practicamente a bay perdi.
No solamente e dolornan cu e ta trece cu ne pa e alumnonan, pero tambe e influencia cu esaki tin ariba futuro di e mucha, cu ora e fracasa na caminda e ta mira su futuro tambe na peliger y logicamente hopi biaha e ta bay reacciona negativamente ariba e comunidad. E consecuencia ta cu e joven aki lo por bira un persona problematico pa su hendenan y su vecindario.
Nos por bisa cu un profesion pa bira maestro ta un vocacion di Dios, di hendenan cu hopi amor pa e muchanan, pasenshi, tolerancia y dedicacion pa educa muchanan pa nan por ser bon ciudadano mañan. Si bo mira cuanto placa gobierno cu placa di e pagador di belasting – a base di prioridadnan - ta hinca den enseñanza, nos mester admiti cu e ta hopi pero no suficiente ainda.
Nos mester admiti cu e amor pa nos muchanan a mengua hopi desde cu frère- y soeurnan a bay for di Aruba y nos a cuminsa Arubanisa nos enseñanza cu tur e consecuencianan pa dominio di e idioma Hulandes na nos schoolnan, cu ta di yora mes y ta un estorbo grandi, mirando e resultadonan pober.
Nos mester bisa cu mayoria di e educadornan ta traha hopi duro pa yuda nos muchanan pa nan por yega na un mihor resultado, pero nan so no por kibra hero cu man. Tin e grupo cu a huelga cu no ta importa nan nada pa nos yiunan, pasobra placa y mas placa, materialismo ta mas importante cu e muchanan. Cu un maestro ta huelga un dia pa duna gobierno un señal cu e kier un mihor salario, indexering y compensacion ta un derecho pa exigi algo mas, pero mester keda responsable tur momento.
Si nos analisa e vocabulario di e maestronan cu e huelga, segun nos e ta un preocupacion. No papia mes di nan actitud y bistimento, manera un set di gueriya cu a bin pa cera Aeropuerto, blokia trafico, kima tire, cera entradanan di Bestuurskantoor, susha Caya Betico Croes, verf y spuit muraya di tur e establecimentonan, lastra bakinan di mata pa cera caya, pone cadena na porta di schoolnan, intimida e gran mayoria di coleganan cu si kier a duna nos yiunan les etc.
Awe e mayornan mester traha un balanza entre e interes pa huelga y nan yiu(nan) cu a ser perhudica. Un mayor ta gasta minimal mas cu Af. 5000,00 pa aña cu cada yiu cu bay school y gobierno pa cada alumno contando tur cos ta gasta por lo menos Af. 50.000,00 pa aña pa cada un. Laga nos no conta otro gastonan imprevisto cu cada mayor tin cu su yiu. Mirando cu e muchanan no a haña 5 siman di les na school, sigur hopi mucha lo keda sinta, druip, no lo sigui school etc.
E pregunta ta kico realmente e sindicato SIMAR a gana organizando 5 siman di huelga , unda nan si tabata tin un ‘stakingsfonds’, pero e alumnonan no tin ningun caminda pa bay y reclama e mal resultadonan escolar!
Lo ta bon pa gobierno haci un estudio profundo di e efectonan cu e 5 siman di huelga tin pa nos muchanan, e gastonan extra pa e mayornan y pa gobierno.
Simar, dal bay cu boso actonan anti-enseñanza cu ta boso pan di cada dia, pasobra sin e muchanan boso no tin trabao pa cria boso familia.”