WILLEMSTAD - Presidente di Parlamento Antiano a keda sumamente asombrá pa e posishon di miembro di VVD i presidente di komishon pa Asuntunan Antiano i Arubano Willibrod Van Beek, kende no ta kere ku ta nesesario pa bini ku reglanan di kondukta pa e kontakto interparlamentario den Reino. Van Beek ta kere ku esaki ta kontra ekspreshon liber di opinion.
E posishon aki ta sumamente straño konsiderando ku tur parlamentonan den Reino, esta di Antia, Aruba i Ulanda mes ya pa dékadanan ta apliká reglamentu di Òrdu pa ku kondukta, asina el a duna di konosé na LA PRENSA. Si t’asina, anto Tweede Kamer mes a violá su mes reglanan. Ekspreshon liber tambe tin su límitenan i si su koleganan ulandes no bai di akuerdo pa bini regla, lo no tin mas konsulta di Parlamentonan den Reino, asina Atacho a enfatisá. Si no tin regla ta bini libertinahe, un situashon insivilisá i no por pèrmití esaki entre parlamentarionan den Reino.
Pedro Atacho i su koleganan antiano i arubano kier pa bini reglanan di kondukta pa e reino interparlamentario. Esaki despues di un insidente inapropiá na luna di yanüari kaminda e miembro di PVV Hero Brinkman a yama polítikonan un nèshi di korupto i a ninga di pidi despensa. Konsekuentemente a prohibié entrada den edifisio di Parlamento.
Atacho no ta kere ku si e reunionnan para, esaki lo tin konsekuensia pa relashonnan den reino i sigur no pa proseso di struktura estatal, ya ku esaki mester keda atendé ku teritorionan insular, kaminda Gobièrnu Sentral tin un ròl di fasilitador. Si e reunion para ta lamentabel, pero lo no tolerá e kondukta aki mas.
Di su banda van Beek no ta haña ku mester bini reglanan di kondukta, pasobra esaki ta kontra libertat di ekspreshon, no ta pòrnada a pone den nos konstitushon. E ta haña ku esaki ta un kuestion di sivilisashon. No ta ekskluí den polítika ku un miembro su ponensia ta keda eksperensiá komo insulto pa e otro. E no ta haña ku mester pone masha atenshon na Brinkman, ya ku ta trata aki di un solo kolega, miéntras ta henter un grupo di kolega e ta trata kuné. Kada un ta pensa diferente i nan tur no ta mesun kos, asina el a enfatisá. Van Beek ta masha kla den su ponensia ku por sierto el a splika tur parlamentarionan den Reino, na momento ku e insidente a tuma lugá na yanüari. Lo e no laga Brinkman kai pa su insultonan. Por sierto ku den Tweede Kamer ta masha kos nan tin ku soportá di e partido aki. Brinkman di su parti a sigui riba su wega di insultá Antia i último ku su partido a bisa ta, ku mester para e proseso estatal. Si no sali afó lo no tin reunion mas i Brinkman a logra su meta. Ta bèrdat ku loke e ta papia no ta korekto, ya ku ta generalisá i stigmatisá henter un pueblo, pero na Ulanda mes ta ningun moshon di e grupo aki no ta pasa.
Antia, Aruba i Ulanda lo reuní awe i mañan riba kontinuashon di e konsulta parlamentario di Reino. E reunion di presidio ta pa evitá problema si bini otro reunion di Reino si esaki tuma lugá manera palabrá den yüni próksimo na Den Haag.