WILLEMSTAD - E kompania venezolano di petrolio PDVSA a skor abou riba tereno di transparensia. Esaki di akuerdo ku e relato 2008 Report on Revenue Transparency of Oil and Gas Companies ku a evaluá 42 kompanianan prinsipal nashonal i internashonal di gas i petrolio operando den 21 pais, basá riba transparensia di nan relatonan, partikularmente pagonan hasí na gobièrnu. Awendia 60% di hendenan mas pober di mundu ta biba den paisnan riku na rekursonan natural. Mayoria konstitushonnan ta duna siudadanonan poder apsoluto di e pais su rekursonan natural. Sinembargo, mayoria dato di loke kompanianan ta paga pa eksplotá e rekursonan aki i kon ta gasta e plaka aki no ta keda publiká pa públiko skrutina. E resultadonan di e relato ta bisa, ku mayoria kompania evaluá no ta duna sufisiente informashon riba pagonan kaminda nan ta operá.
Un kantidat limitá di kompania ta duna informashon di pagonan, demostrando ku esaki ta posibel. Orígen di e relato ta sinta den movementu global pa kombatí ‘maldishon di rekurso’ 1. Petrolio i gas ta generá hopi rikesa, pero si esaki keda manehá defisientemente e ganashinan por mina kresementu ekonómiko, krea insentivonan pa aktividatnan di hür, trese korupshon den sektornan públiko i privá i hasta konflikto. E pobresa, instabilidat i regla di lei defisiente no ta solamente malu pa hendenan lokal, pero tambe por daña reputashon di e kompania i generá ménos ganashi pa invershonistanan.
Por lo general no por bisa ku PDVSA ta transparente. E relato ta bisa, ku Venezuela ta un eksepshon den paisnan rondó di dje kaminda datonan di kompanianan di estado si ta keda publiká. Kousa di esaki ta falta di regulashon. Venezuela mester amplia su disponibilidat pa duna informashon. Ta importante pa PDVSA duna informashon ku por keda investigá públikamente.
Venezuela lo hasi bon pa obligá kompanianan petrolero ku ta operá den e pais pa publiká nan pagonan na gobièrnu. Kompanianan manera National Petroleum Corporation, Exxon Mobil, BP i Total ku ta operá na Venezuela, tambe a skor abou den transparensia. Sinembargo, Statoil, Petrobras i Shell ta eksepshonnan positivo riba tereno di transparensia, maske ku Statoil ta nenga di duna informashon tokante Venezuela.
Informashon riba pagonan, operashonnan i programanan anti korupshon ta e mihó manera pa duna transparensia di ganashi. Esaki lo proveé sosiedat i otro partnernan informashon ku nan mester pa pone gobièrnu responsabel kon nan ta gasta parti di ganashinan di e kompanianan. Esnan ku ya ta duna informashon mester ekspandé esaki pa tur pais kaminda nan ta operá, segun e relato.