WILLEMSTAD - Miéntras ku Staten mañan atardi lo reuní internamente riba e asuntu aki, miembro di parlamentu Faroe Metry no ta niun tiki kontentu ku e lei ku Komishon Sentral di parlamentu antiano a trata i aseptá algun dia pasá den kuadro di esfuersonan pa kombatí aktonan di terorismo i finansiamentu di aktividatnan terorista.
Algun dia pasá, Staten a diskutí i aprobá e proposishon di lei aki den reunion di Komishon Sentral i awor ta preparando pa e bai reunion públiko.
Di akuerdo ku gobièrnu, tin nesesidat urgente pa trata i aprobá e lei aki promé ku mei 2008. Ta trata di un lei ku ta regla kombatí aktividatnan di terorismo, kombatí finansiamentu di aktividatnan di terorismo, kombatí partisipashon na aktividatnan terorismo i tambe labamentu di plaka ku tin di aber ku terorismo.
Si Antia no aprobá e lei aki, Antia ta kore e riesgo ku su organisashon Meldpunt Ongebruikelijke Transacties (MOT) di ser ekspulsá for di e asina yamá Egmond Groep.
“Ta ki mishi nos mete den e kos aki? Nos ta biba den un region ku semper a ser kalifiká komo un region di pas. Ami ta kuminsá kere, ku nos mester kumpli ku e petishon ku nos a haña, djis pa tene stupi di otro limpi,” tabata konklushon di miembro di frakshon di Partido Nashonal den Staten mr. Faroe Metry.
Metry tabata un di esnan ku a hiba palabra durante tratamentu di e proyekto di lei aki den parlamentu. E parlamentario a mustra, ku e tin su pensamentu riba e proposishon di lei aki.
“Nos ta papiando di un kos ku en realidat nos no tin ni arte, ni parte den dje. Ta otro paisnan ta krea problema ku otro paisnan ku ta kondusí na konfliktonan ideológiko. Pero ku e konsepto aki di terorismo, tambe nos mester paga bon tinu. Ta meskos ku den añanan 50, tempu ku mundu oksidental tabatin problema ku otro paisnan riba tereno ideológiko, bo ta haña e akusashon ku e otro paisnan ta komunista,” Metry a trese dilanti. Na lugá di komunismo, awendia ta mantené e konsepto terorismo”, el a agregá.
“Nos komo un pais chikitu ku ta dependé di otronan pa nos entrada finansiero i pa nos desaroyo ekonómiko, no tin masha di aber ku e asuntunan aki. Awor, a base di tratadonan internashonal nos ta haña nos metí den e kosnan aki, nos ta haña nos dilanti e situashon di sino fono,” Metry a bisa.
E parlamentario a atmití di otro banda, ku si Antia no kumpli, e lo hañ’é ku konsekuensianan ferfelu. Di akuerdo ku e proposishon di lei mes, e impakto riba ekonomia di nos pais lo ta un kos hopi serio.
“Pero kiko ta e alternativa? Konsiente ku si bo no hasié, bo ta sufri e konsekuensianan, bo ta haña bo ta sukumbí pa e preshon, pasobra di otro forma ta forsa brutu paisnan grandi ta pone riba bo pa bo kumpli tòg. Atrobe nos ta haña nos ku un ehèmpel di un lei ku ta destiná pa tene stupi di otronan limpi,” e lider di frakshon di Partido Nashonal di Pueblo a bisa.
El a mustra riba e hecho, ku Antia di tur manera ta sinti efekto di e lei aki, pasobra tin otronan ku ta probechá.
“Konsekuensia di e lei ta, ku desaroyo ta bai pa otro pais. Nos tin e situashon awor aki kaminda un lugá manera Miami, un isla manera Malta, e isla Cyprus, tur ta probechá, pasobra hopi hende ta bai pone nan sèn na e lugánan aki. Ta meskos ku sektor off shore: miéntras ku nos ta hasiendo tur kos pa mata e sektor aki, otronan ta probechá. Pero kiko nos por hasi? Nos ta manera nan ta bisa, between the devil and the deep blue sea. Nos pais básikamente mester skohe entre loke ta malu i loke ta pió. Otro alternativa no tin,” Faroe Metry a bisa.
Mañan djamars, parlamentu antiano ta bini huntu pa 3’or di atardi den un reunion ku karakter interno pa diskutí e materia aki. T’asina ku durante e reunion públiko menshoná, miembro di frakshon di PAR Marlon Jamaloodin a pidi presidente di Staten pa konvoká un reunion ku minister di Hustisia David Dick pa asina informá Staten kiko realmente ta pasando, esta si tin organisashonnan terorista ku ta aktivo den nos pais i kiko ta nan aktividatnan.
Jamaloodin a proponé un reunion di Komishon di Hustisia, pero presidente di parlamentu finalmente a skohe tòg pa un reunion di Komishon Sentral sera, ya ku e ora ei tur miembro di Staten ta haña e informashon pareu.
Komishon Sentral di Staten, manera indiká kaba, a bai di akuerdo ku e proyekto di .lei ya menshoná i awor lo mester trat’é próksimamente den un reunion públiko.