WILLEMSTAD – “Teritorio insular di Kòrsou tin su presupuesto nobo pa 2008: e presupuesto aki, adaptá despues di último desaroyonan awor ta mustra un défisit di 103 mion florin. Pa kubri e défisit aki, lo mester introdusí di un banda medidanan pa redusí gastu i oumentá entrada, miéntras ku di otro banda lo mester weta kiko por hasi riba merkado finansiero lokal. Hecho ta ku kada ken mester duna nan aporte”, asina diputado di Finansa Mike Willem a enfatisá.
Konseho Insular, fin di aña pasá a trata i aprobá kaba presupuesto pa e aña koriente. E presupuesto ei tabata basa di un banda riba e promesa di Ulanda ku e ta karga un parti supstansial di e défisit di e aña aki – ku Kòrsou mes a kalkulá na 103 mion florin – miéntras ku a keda un défisit mas di 66 mion florin, ku teritorio insular di Kòrsou mes, mester a weta kon e ta finansiá esaki.
Den e kuadro ei diputado Mike Willem a anunsiá, ku den e promé kuartal di aña 2008, e lo presentá un plan pa indiká kon ta bai kubri e défisit di 66 mion aki (e asina yamá “dekkingsplan”).
E plan aki sinembargo a tuma mas tempu ku gobièrnu mes a pensa, loke tabata motibu tambe pa partidonan di oposishon hala atenshon di Bestuurscollege ku Konseho Insular ketu bai ta wardando riba e plan aki. Partikularmente e miembro di frakshon di Forsa Kòrsou Gregory Damoen a lansa krítika riba gobièrnu pa e desaroyo aki.
Pero, manera entretantu ta konosí, e situashon a bolbe kambia, awor ku a resultá ku e proseso di saneamentu di debe di parti di Ulanda no por kuminsá ainda. E echo ku St. Maarten no ta di akuerdo ku vários di e puntonan den e lei ku mester regla supervishon finansiero pa Kòrsou i St. Maarten a pone ku e trayekto aki a stanka di manera ku e no por kuminsá mas meimei di e aña aki, manera tabata e intenshon. Ku konsekuensia, ku e défisit di 103 mion ku en prinsipio Ulanda mester a kubri, ta bèk grandi-grandi riba mesa. Manera LA PRENSA a informá ampliamente kaba, diputado Willem a indiká, ku lo mester bai hasi un apelashon riba merkado di kapital pa weta kon por kubri e défisit aki.
Esaki lo bira tambe e presupuesto ku Bestuurscollege lo mester trata den transkurso di e siman aki.
Diputado Willem a splika ku den e plan pa kubri e promé parti dje défisit – esta e 66 mion florin – lo bin ku medidanan ku ta nifiká ku tur hende mester aportá, pa por yega na un presupuesto responsabel.
E situashon di Gobièrnu Sentral no ta masha diferente. Aki tambe e proseso di saneamentu di parti di Ulanda no por kuminsá ainda. Ounke e sifra ofisial no ta kla ainda, ta antisipá ku e défisit aki tambe ta bai laba entre 100 pa 200 mion florin.