WILLEMSTAD/ ORANJESTAD - Ministerio Públiko na Aruba a disidí ku e ta bai hasi uso tambe di klarividente pa yuda solushoná e kaso di e damita merikano ku a disparsé, Natalee Holloway.
Te ku awor tin mas di 10 klarividente ku a mèldu kendenan ta pretendé ku nan sa kon el a disparsé i na unda Natalee Holloway ta awor aki.
“Un di nan a bisa, ku e sa sigur ku Natalee Holloway ta na bida ainda i ku e ta bibando awor aki na Venezuela. Un otro ta bisa ku e tin sigur ku e damita ta derá na e parti ost di Aruba. Nos ta investigá tur tep ku nos haña, inkluso esnan ku bini di klarividente,” asina Hans Mos, fiskal mayó na Aruba kende ta enkargá ku e kaso aki a deklará.
Natalee Holloway a disparsé misteriosamente dia 30 di mei 2005 na Aruba, despues ku el a bishitá e isla aki den kuadro di selebrashon di finalisashon di su estudio. E último hende ku supuestamente lo tabata den su kompania tabata Joran van der Sloot.
Joran van der Sloot sinembargo a keda deklará insistentemente ku e no sa nada di desaparishon di Holloway i ku el a bai laga e damita riba playa kaminda nan tabata.
Reportadamente Van der Sloot lo a mata òf a sòru pa kurpa sin bida di Natalee Holloway disparsé. Tabatin vershonnan insistente ku un amigu di dje ku tin un boto a yud’é pa benta e kurpa na laman ganchu.
No opstante un búskeda sin presedente den istoria di Aruba, kaminda Ulanda, Merka i otro paisnan a duna nan yudansa, no opstante ku a gasta miónes di plaka – últimamente ku un barku sonar spesial di investigashon merikano – no tabatin niun resultado. No a haña niun pista di e damita aki.
A detené i sera Joran van der Sloot na dos okashon den pasado, pero mester a lag’é bai, despues ku no tabatin sufisiente prueba pa sigui mantené será.
Segun fiskal Hans Mos, uso di klarividente den intento pa solushoná kasonan kriminal no ta algu straño. Inkluso t’asina ku a yega di hasi uso di miradó di destino tambe.
“Pero te asina leu ku mi ta na altura, nunka a logra solushoná un kaso di e forma aki,” Mos a bisa.
Manera LA PRENSA a informá anteriormente, entretantu abogadonan di Beth Twitty, mama di e damita merikano ku a disparsé misteriosamente riba suela di Aruba kasi tres aña pasá, a manda yama tur esnan ku tabata sospechoso òf ku tabatin di aber ku e kaso aki pa nan aparesé den korte. Esaki, den kuadro di un kaso ku nan ta preparando pa eksigí daño perhuisio pa loke mama di Natalee Holloway a pasa ‘den.
E dos abogadonan ku ta kuida interes di Beth Twitty ta Bram Moskowicz i Rogier Schmidt. Nan ke kuminsá un kaso pa daño perhuisio pa e daño mental ku nan kliente a sufri, komo konsekuensia di e aktitut di Joran van der Sloot.
No a menshoná e montante konkretamente, pero reportadamente ta trata aki di un suma supstansial.
Entre esnan ku lo sita pa aparesé den korte, ta figurá naturalmente Joran van der Sloot, pero tambe su mayornan, Patrick van der Eem ku ta esun ku lo a provoká un “konfeshon” di parti di Joran van der Sloot, e reportero pa asuntunan kriminal Peter R. de Vries, e dos rumannan Deepak i Satish Kalpoe i vários otro figura mas.
Segun abogado Moskowicz, den e kaso aki esnan ku a sita lo no por hasi un apelashon riba nan derechi pa keda ketu. Tur hende mester papia, pasobra final di kuenta mester bin klaridat den e kaso aki, el a bisa.
Den e kaso spesífiko di Joran van der Sloot no ta masha kla ainda kiko lo bai pasa, komo ku Van der Sloot a laga pone su mes bou di kuido i tratamentu sikiátriko. Supuestamente e lo tin problema síkiko pa motibu di henter e suseso, ounke ekspertonan ta tene kuenta ku esaki por ta un manera tambe pa despistá outoridatnan pa asina no sigui ku persiguishon kontra dje. Di otro banda mester bisa, ku algun dia pasá a sali na kla, ku Van der Sloot ta bibando un bida di parandero na Tailandia. A señal’é ta festehá na e pais aki, por sierto despues di a estafá un bon amigu di dje, reportadamente pa 6 mil euro.
Segun fiskal Mos, Ministerio Públiko no tin intenshon di laga e kaso aki muri. Sigur awor ku Van der Sloot mes ta sigui provoká.
“For di despues di e reportahe di Peter R. de Vries, a surgi un ola di informashon riba e kaso aki. I ta Joran van der Sloot mes ta esun ku ta sigui insistí, manera e ta sigui hasi den e kaso aki,” asina Hans Mos a agregá.