DEN HAAG/ WILLEMSTAD - Komishon “Stop de Vernedering op Schiphol” ta preparando un marcha di protesta kontra e kòntròl 100 porshento na aeropuerto di Ulanda Schiphol.
“E forma denigrante, humiyante i ofensivo ku ta atendé ku stranheronan, partikularmente ku karibensenan durante e kòntròl aki ta inaseptabel”, asina Glenn Codfried, un surinameño a deklará.
Outoridatnan ulandes, mediante vários informe ofisial último lunanan ta insistí ku e kantidat di keho a baha, pero pasaheronan ku mester pasa den e kòntròl aki ta bisando nèt kontrali.
“E situashon a bira solamente mas serio i e kantidat di keho a oumentá”, asina Codfried a konfirmá.
Codfried a relatá e eksperensia di un persona ku nan a detené na Schiphol. A wanta e persona aki durante un siman largu.
“Nan a mishi ku mi den tur sorto di manera. Nan a trata mi komo un kachó. E kaso aki ta hopi tristu i tabatin konsekuensia serio pa mi salú, pasobra awor aki mi ta sufri di preshon haltu. Anto un otro konsekuensia di esei ta, ku mi no por haña un trabou fiho,” asina e siudadano a duna di konosé.
El a bisa, ku mester ta bon kla pa tur hende ku no por bagatelisá e kos aki.
Glenn Codfried a bisa, ku último lunanan aki e kantidat di keho a oumentá. Tin hende asta ta bou di e impreshon ku outoridatnan ta birando mas rasista kada bes di nobo. “Konsekuensia ta”, segun Codfried, “ku mas i mas hende ta haña hasta miedu di biaha entre Sürnam i Ulanda. Esaki simplemente no por”, el a agregá.
El a bisa, ku huntu ku un grupo di persona, nan ta planiando awor aki pa tuma akshon. Un dje akshonnan ku e grupo ta konsiderando ta, pa tene un marcha di protesta na un sitio vulnerabel. Nos lo tene akshon kaminda Ulanda ta sinti esaki su efekto mas tantu el a bisa, sin kier a duna mas detaye. El a atmití ku Schiphol ta un opshon.
Codfried ta kere ku siudadanonan di Sürnam mes tambe, mester partisipá na e akshon aki. El a bisa di ke hasi uso di tur método posibel pa komuniká ku poblashon di Sürnam, inkluso di e liña aéreo SLM.
Loke mas ta molesti’é, ta e hecho ku gobièrnu ulandes mes no ta reakshoná riba e denunsia konstante ku tin riba e kos aki. Anto segun ami, “wie zwijgt, stemt toe,” Glenn Codfried a indiká.