PARAMARIBO/ WILLEMSTAD - Promé minister di Ulanda Jan Peter Balkenende tambe mester pasa den un kòntròl 100 porshento, ora e yega aeropuerto Zanderij na Sürnam. Lider di e partido Nationale Democratische Partij (NDP) a lansa e gritu aki na bispu di yegada di e promé minister ulandes na e eks kolonia di Ulanda.
Bouterse a hasi e plegaria aki durante un reunion di un reunion di su partido na Paramaribo.
Bouterse ta haña ku a base di e prinsipio di resiprosidat, mester laga tur pasahero ku ta prosedente di Ulanda pasa den e kòntròl 100 porshento, meskos ku yunan di Sürnam ta pasa den e kòntròl aki ora nan yega Schiphol.
“Balkenende tambe. Nos tin e derechi di hasi mesun kos ku e ulandesnan ta hasi na otro banda di oséano,” asina Bouterse a komentá.
E asuntu di kòntròl 100 porshento aki ta keda un problema serio. Desi Bouterse a akusá gobièrnu di presidente Ronald Venetiaan di no tin e kurashi pa aktua. Segun e lider di NDP alabes eks hefe di ehérsito di Sürnam, gobièrnu di su pais mester insistí pa eliminá e kòntròl aki na Schiphol.
Venetiaan huntu ku su kolega pa Asuntunan Eksterior, Lygia Kraag-Keteldijk, a bolbe hala atenshon di Ulanda resientemente ku e asuntu aki ta forma un punto di hopi doló den e relashon entre Ulanda i Sürnam. Nan ta papia di “trato inhumano i humiyante kontra pasaheronan di Sürnam na Schiphol.”
Manera ta konosí, promé minister di Ulanda Jan Peter Balkenende i su kolega pa Asuntunan Eksterior Maxime Verhagen lo bishitá Sürnam dianan 13 i 14 di mei benidero. Promé minister Balkenende tabata na Sürnam kaba na 2005. Na okashon di e bishita ei, el a indiká klaramente ku Ulanda ta duna hopi balor na un relashon kordial i amistoso entre Sürnam i Ulanda.
Tur hende ta tene kuenta ku un asuntu ku sigur lo subi mesa durante e enkuentro ta e problemanan rondó di e kòntròl 100 porshento na Schiphol. Tin hende ta bisa hasta, ku e asuntu aki lo haña “máksimo prioridat” den e kòmbersashonnan ku lo tuma lugá.
“E kos aki ta un problema ku ta kousando hopi doló,” asina Venetiaan a yega di bisa den pasado. Algun aña pasá, Ulanda a introdusí e kòntròl 100 porshento aki pa buelonan for di Sürnam – i otro paisnan di riesgo, manera Antia i Aruba – pa asina kombatí e problema di gulidónan di bolita ku ta drenta Ulanda ku kokaina.
Sürnam manera ta konosí, a bisa na diferente okashon ku e no tin problema ku e kòntròl riba su mes, pero si tin masha hopi problema ku e forma ku ta ehekutando e kòntròl aki.
“Nos no ta di akuerdo ku e forma denigrante i humiyante ku ta trata nos siudadanonan na Schiphol ora ta kontrolá nan,” asina Ronald Venetiaan a bisa.
Balkenende i Verhagen lo bishitá Sürnam riba ruta pa nan bishita na e konferensha di lidernan karibense, latinoamerikano i oropeo, ku ta tuma lugá na Lima, Perú.