WILLEMSTAD – Tin hopi pensamentu enkuanto bistimentu di faha di seguridat. Kasi tur dia polis ta parti un kantidat di prosèsverbal pa outomobilistanan ku ta kibra ku e regla akí. Siudadano i polítiko Rònchi Marlin, durante di su trabou komo polis a mira ku su mes wowo kiko ta e konsekuensianan ora un outomobilista no tin su faha bistí.
“Bistimentu di faha di seguridat ta ko’i makaku. Si asina mes, bistimentu di faha di siguridat ta ko’i makaku i hasimentu di drùk. Esei ta loke masha hopi hende mes ta pensa i papia ketu bai. Ora tin kòntròl di polis bo ta mira nan lihé lihé ta bisti e faha di siguridat pa no haña un but. Ora nan kaba di pasa e kòntròl ta kita kos benta un banda.” Marlin ta papia di eksperensia i e ta reta tur hende pa wak pa nan mes. “Para na un kaminda ku hopi outo ta pasa i nota kuantu hende ta kore sin nan faha di siguridat bistí. Ku un tiki suèltu di 10 outo ku pasa, lo bo por nota ku mas ku mitar ta kore sin faha di siguridat bistí. Hasiendo e trabou ku te ainda mi ta ehersé, m’a yega di saka hende for di outo ku frenta i kabes tur habrí, wowo(nan) saká òf distruí, nanishi destrosá, boka sin djente dilanti, lepnan di kap òf tur destrosá, whip-lash òf den kasonan ekstremo, garganta kibrá i pues morto, pechu tur plamá for di otro, okashoná pa e stürwil, hep kibrá ku hopi bia ta laga e shofùr mankaron dor ku el a skùif bai dilanti dor di e impakto i e pianan ta pega den dash-board, kibra hep parsial òf kompleto, i finalmente kibra tur kos den un klap den e parti ariba i abou di e kurpa i konsekuentemente, e shofùr ta resultá morto.”
Marlin ta bisa ku tur esakinan ta dor ku e shofùr no a bisti su faha di siguridat, pasobra ta ko’i makaku. “Ta abo mester sa, si bo ta sigui pensa ku ta ko’i makaku si òf no. Pero no bin bisami kuenta di ami no ta kore duru, ta p’esei ami no ta bisti mi faha di siguridat. B’a pensa riba e shofùr ku ta kore riba 100 kilometer pa ora pèrdè kòntròl bin pega frontal òf di patras inesperá riba bo? Ami a pèrdè kòntròl di konteo kuantu hende a sali seriamente heridá òf morto a konsekuensia di no tabatin nan faha di siguridat bistí. Bo tambe ta sigui pensa ku bistimentu di faha di siguridat ta ko’i makaku? Ta abo mester sa, si bo ta destruí sierto partinan di bo kurpa, bira mankaron òf pèrdè bo bida dor di no bisti bo faha di siguridat. Bo mes disidí, ta bo bida. Sea bo ta stim’é i kuid’é òf bo ta bent’é afó. Kiobo?