WILLEMSTAD – Djasabra e promé partido ei e Playoff Kaya Kuater a kuminsá.
Hubentud Fortuna, kampion di e temporada regular 2007/2008 a sali riba un atake fuerte kontra di Centro Dominguito, loke a pone ku nan mester a hunga riba kontra-golpe.
E muchanan di Hubentud Fortuna tabata ataka pero sin resultado, loke a pone ku e ekipo di Dominguito sigur den e promé mitar mester a defendé tur ku tin.
Kenneth Kunst i Clifford Braafhart no por a hunga ya ku Kunst tin suspenshon i Braafhart akumulashon di karchi.
E wega ta bai sosegá sin anotashon.
Despues di sosiegu e dos timnan a sali meskos riba otro.
Centro Dominguito a trese un kambio ora ku Rudmar van Eyten a drenta na lugá di Ivandell Meulens. E kambio aki a bin resultá ora ku van Eyten a bin anotá e úniko gol di partido despues ku Asjar Bernardus a kobra un tiru liber ku Van Eyten ta kòp aden.
Despues di e gol aki Centro Dominguito mester a defendé ku alma i kurpa ya ku Hubentud Fortuna a basha un avalancha di atake, pero sin resultado.
Centro Dominguito di e manera aki ta logra nan promé viktoria di playoff.
Ayera e dos ekiponan di Banda Abou, Centro Barer i Undeba a topa otro.
Tabata un partido ku a hunga mas tantu meimei di tereno.
E ekiponan tabata bon riba otro i no tabata pèrmití otro nada.
E weg ta bai sosegá sin anotashon.
Djis despues di sosiegu Jair Keller ta bin haña un oportunidat i ta manda su ekipo Undeba dilanti 1-0.
No muchu despues Centro Barber ta bin haña un pinalti ku Edgar Cassiani ta kobra ku éksito pa empatá e partido 1-1.
Faltando kasi nada, despues ku algun fanátiko a kuminsá bandoná stadion Ergilio Hato, ya ku e wega sigur lo keda empatá nan ta tende bochincha, ora ku nan di 89 minüt, Stewart Sambo riba un pase di Cassiani ta bin marka e gol pa duna Centro Barber e viktoria di 2-1.
E gol aki ta pone tambe ku Centro Barber ta bira lider di e playoff, empatá na promé lugá ku Centro Dominguito.
E playoff ta kontinuá djabièrnè awor, 9 di mei, ku Undeba kontra di Centro Dominguito i djasabra 10 di mei, Centro Barber kontra di Hubentud Fortuna.


-0-0-


Selekshon di Futsal di SSFDC ta gana dos i empatá un wega


WILLEMSTAD – Informashon for di Repúblika Dominikana ta bisa ku e selekshon di Futsal di studiantenan di Kòrsou, konsistiendo di hungadónan di OTC i di UNA, a partisipá den un torneo na e pais di merengue di 1-4 di mei último.
E selekshon di Kòrsou a logra viktoria den nan promé partido di 11-5, ta empatá 2-2 den e di dos partido i den e di tres partido ta logra triunfo di 4-3.
Un di e hungadónan di e selekshon Joe Amy Betrian di UNA ta haña un leshon fèrfelu na su rudia.