WILLEMSTAD – Djaweps dia 1 di mei, Dia di Trabou, tabatin kareda di kabai riba Hipódromo Almirante Luis Brion ku shete kareda.
E kareda mas importante di e fecha aki tabata e Klásiko Dia di trabou riba 1700m, e di seis kareda ku a keda ganá den gran forma pa Grand Saints despues ku el a bini bèk i pasa mid West ku un dado momentu a pasa Grand Saints na kaminda.
Grand Saints ku Oscar Huerta i di stud BC i prepará pa Hensley “Chikí” den Haage, a gana e kopa. Na di dos lugá a terminá Mid West ku Robinson Arias, Touch for Luck ku José Gregorio Valera a sali na di tres lugá i Black Pass ku Elvis Moran na di kuater lugá.
E promé kareda di e atardi a kore riba 1300m pa Kabai Krioyo ku ginete aprendis.
Pinta ku Diego Margaretha ta bin gana e kareda aki den raya. Pinta ta di stud Hermanos Melendez i prepará pa Roger Nivelac. Na di dos lugá Nitro ku Kenyon Bonifacio a sali na di dos lugá i The Ghost ku Juni Bonifacio a sali na di tres luga.
E di dos kareda riba 1300m pa Kopa Vanddis N.V. pa kabainan machu a keda ganá konvinsentemente pa Sekretario ku Robinson Arias. Sekretario ta di stud ISA i prepará pa Edward Margaretha.
Na di dos lugá a sali Handssign ku Alexander Hanst i Melodic Dreams ku Elvis Moran a sali na di tres lugá.
E di tres kareda 1300m pa yewa a resultá den un viktoria pa Balbi Home ku Oscar Huerta ku ta gana fásil. Balbi Home ta di stuk Never Say Never i prepará pa August “Bubu” Muller.
E di kuater kareda pa kabainan pèrdèdó ku ginete aprendis e kabai Arsenal a yega na promé lugá ku Diego Margaretha ku ta empatá na promé lugá riba e estadístika di aprendis. Arsenal ta di stud H-6 Cars i ta prepará pa Rudi Hanst.
Na di dos lugá a sali Class Dancer ku Ramir Martis i Lebribon ku Juni Bonifacio a sali na di tres lugá.
E di sinku kareda, riba 1200m pa kabainan machu ganadó di dos, e kabai Bold Expression ku Elvis Moran a gana di punta punta. Bold Expression ta di stud Gavilan i prepará pa Gerard van Lohuizen.
Na di dos lugá a sali Tri for Birdie ku Alexander Hanst, miéntras ku Inquieto a retirá.
E último kareda riba 13400m pa Kopa Boutique Angelo pa yewa e kabai No Mercy ku José Gregorio Valera a mantené su invikto den sinku salida. No Mercy ta di stud China Towns i prepará pa August “Bubu” Muller.
Na di dos lugá a sali Watrip ku Alexander Hanst i Shamablá ku Robinson Arias a sali na di tres lugá, miéntras ku Miss Miles ku Oscar Huerta a sali na di kuater lugá.
Próksimamente lo bai tin otro Kareda di Kabai na Hipódromo Almirante Luis Brion.