ORANJESTAD- Minister drs. Marisol Lopez-Tromp a haci apertura di e preparacion pa 12 “tanchi” pa grupo di Traimerdia. Traimerdia ta encarga cu e cuido di mucha di enseñansa preparatorio y primario despues di scol. Traimerdia ta ofrece cuido y guia na muchanan aki y ta contribui na e desaroyo di mucha.
Den total ta existi 6 centro di cuido despues di scol, reparti riba henter e isla y incorpora den cierto scol basico. Bo ta haya centronan di Traimerdia na Scol Basico Washington na Noord cu lo amplia cu 3 grupo, Colegio San Hose na Santa Cruz cu lo amplia cu 1 grupo, Maria Goretti na Paradera cu lo amplia cu 2 grupo, Paulus Scol na San Nicolas cu lo amplia cu 3 grupo, Fransiscus College na Madiki cu lo amplia cu 1 grupo y Conrado Coronel na Mahuma cu lo amplia cu 2 grupo.
Cada centro tin un lider, un guia di huiswerk y un cantidad di guia di grupo. Cada guia di grupo ta duna guia na un grupo di maximo 24 mucha.
Manera anuncia anteriormente Minister drs. Marisol Lopez-Tromp pa 2008 ta duna prioridad na expansion di Traimerdia. P’esey di acuerdo cu plannan stipula pa aña 2008 ta ampliando Traimerdia cu 12 grupo y den cuadro di e expansion aki Traimerdia a selecciona, despues di un procedura habri di solicitud, 12 guia nobo di grupo. Tin lugar awor pa 300 mucha nobo na Traimerdia.
Minister drs. Marisol Lopez-Tromp ta sostene e trabaonan di Traimerdia pues esaki ta cuadra den su maneho social educativo pa hisa calidad di bida pa tur hende na Aruba y tambe hisa calidad di enseñansa.
Mientras cu mayornan ta traha, e guianan aki na Traimerdia ta cuida, guia y sostene nos yiunan den nan desaroyo y cu nan huiswerk.
Un comision a traha duro pa entrevista y selecta e guianan nobo pa Traimerdia. Entre otro nan a pone enfasis riba e calidad di guia y pesey a escohe lidernan cu tin preparacion riba nivel di MBO y alaves e punto di salida ta cu tur cu haña e responsabilidad aki ta stima mucha y lo tin hopi pasenshi.
Minister drs. Marisol Lopez-Tromp ta desea tur “tanchi” nobo hopi amor y dedicacion den nan trabao nobo y ta spera cu nan lo ta un inspiracion pa e muchanan.