Gobierno di MEP ta sigui cuestiona accion policial

Pero Minister di Husticia no ta actua

ORANJESTAD- E ultimo caso di tiroteo entre polisnan y un persona cu desde 2004-2005 tur instituto cu tin di haber cu husticia ya caba a ser poni na altura di su presencia ariba e isla aki y su posibel envolvimento den organisacionnan paramilitar y relacionnan criminal cu FARC ta wordo cuestiona den e comunidad Arubano, ya cu tur hende ta puntra nan mes, ta kico a ser haci cu tur e informnacionnan ey. Si no ta pa e control di number di auto, awe ainda un persona asina peligroso ta cana y biba mei mei di nos cu tur e consecuencianan cu esaki por tin. Con esaki ta posibel? Esaki ta ora cu institutonan no ta haci caso di informacionnan valioso y di cual nan mester por haci trabao mesora di dje. Institutonan importante tin mas tempo pa practica politica partidista cu nan trabao mes!
Con por ta posibel cu varios aña pasa tabata tin informacion di e persona sumamente peligroso aki, anto ningun dia pueblo inocente por a mira potret di e persona aki na television ni den corant of ariba poster pa tur hende por yuda rondi’e.
Si bo mira con balente y tof polisnan tabata pa cera trafico dilanti Aeropuerto, sera 4 siman dilanti Bestuurskantoor, bolter baki di mata dilanti oficina di gobierno, yuda carga e bakinan pa blokea tur entrada y salida di Bestuurskantoor, kima tire, bebe gallonnan di whiskey dilanti Bestuurskantoor, drenta y ocupa un paar di dia ilegalmente nos Parlamento, core parada ilegal uzando auto y gasolin di gobierno, hunga pa polis di trafico na short y t-shirt etc. Di con polisnan no ta actua contra e verdadero criminalnan, bendedornan di droga, labadornan di placa, bendedornan di arma, hendenan cu ta cumpra entre otro joyasnan horta, material di construccion etc.? Di con e ora ey si nan mannan ta mara?
E momento di berdad a yega pa nos puntra gobierno, con por ta posibel cu su intitutonan cu tabata sa di presencia di e homber super peligroso aki y su lazonan cu baho mundo, anto nunca a avisa pueblo. Pakico no ta publica na television, den corant, ariba poster e potret di e malandronan aki? Pakico hendenan decente - pasobra nan ta MEP - nan si ta ser exponi pa pueblo pa instiga contra nan como sifuera nan ta malhechornan grandi?
Hopman y su gang ta tof, fresco, arogante pa listra hendenan di MEP na nan curpa, den nan auto, na nan cas, anto di con Hopman y su tribo di abusadornan no ta actua contra e verdadero criminalnan cu lazonan cu organisacionnan peligroso ta pasobra e tin miedo. Esey ta pasobra di e homber inocente bo por abusa, pero esnan cu por contesta bo, bo ta keda keto of ta bebe hunto cu nan.
Si pueblo mira cuanto placa ta ser hinca den institutonan cu mester yuda nos combati criminalidad y e rendemento ta laga hopi di desea, anto a yega ora pa separa e bon di e mal elementonan, pasobra ya ta laat caba.
E polisnan cu a huelga a manda un señal pa criminalnan cu nan no ta obedece orden di nan superiornan y ta haci y deshaci y ta laga e huelgistanan tuma orden publico den nan man.
Politica partidista a penetra completamente den e Cuerpo Policial cu mientras tin ta hunga domino, pueblo a keda 5 siman sin defensa of proteccion.
Te aki e comunicado di gobierno di MEP pero por a nota cu ningun caminda e mesun Gobierno aki ta anuncia medidanan disciplinario contra di cualkier agente policial y caminda Minister di Husticia Rudy Croes, por tuma medida si e ta desea esaki of si el a nota cu polisnan a haci algo malo.