Skina di Sorti, awe djamars 6 di mei di 2008, ta kuminsá ku deseá un i tur un bon dia. Hopi hende ta yega den un posishon, kaminda nan por influensia direkshon, dinámika i dimenshon di maneho, pero al final di kuenta no ta yega mas leu ku ahustenan marginal di sea sekuensia, dimenshon òf momentu ku kosnan ta sosodé. Pa saka un pais for di un situashon den retaguardia i pon’é den un posishon kompetitivo, kambio di direkshon ta un “must”. Ku paisnan ta kai for di posishon kompetitivo pa unu den retaguardia por lo general tin mas di haber ku falta di liderazgo ku e tin di haber ku influensia aheno.
****
Den paisnan supdesaroyá, e peso den e aspirashonnan (ambishon sano) ta mas riba poder komo ophetivo riba su mes ku riba poder komo instrumento pa apliká influensia riba direkshon di maneho. E investigadó sientífiko David C McClelland, a skirbi un buki hopi interesante riba e materia aki titulá “The Achieving Society”. Den paisnan avansá e aspirashon pa realisá kos (“need for achievement”) serka esnan ku ta den direkshon ta dominá.
****
Serka nan no tin ophetivo apsoluto, pero mas bien un mishon kontinuo di mehorashon di bo mes. Ta p’esei tambe nan no ta yega i despues sak den anominato, pero una bes nan a yega, nan ta sea sigui progresá òf mantené nan mes komo kompetidor. Esnan ku ta mira poder komo ophetivo riba su mes, ta hasi lokual ta nesesario pa gana i mantené poder. E mayoria sigur den posishon polítiko ta mas bien “crowd pleasers” ku nan ta liderá.
****
En bes di liderá nan ta bai ku e koriente i suerte ta determiná resultado di e periodo ku nan a okupá e puesto di poder. Meskos ku den sektor komersial bo ta hasi diferensia entre un direktor (mas bien un sorto di konduktor di proseso) i e “entrepreneur” (kreador di proseso), den gobernashon tin diferensia entre lider ku mando (“leiderschapkwaliteiten”) i lider ku ta un simpel kabesante.
****
Un kabesante ta wòrdu skohé òf aseptá sin ku nesesariamente e tin e don pa fiha un direkshon i guia siguidónan na e determinado meta. Hopi lider di tendensia karismátiko ta keda un kabesante, pasobra nan ta karesé di vishon, don di mando, konvikshon i determinashon. Na momentu di atversidat bo ta rekonosé ta ken ta ken. E gran lider britániko sir Winston Churchill a yega di bisa “Kites rise highest against the wind -- not with it”. Pues hopi ta kalsa posishon haltu, pasobra nan ta probechá di e situashon di momentu.
****
Si a toka Kòrsou di hiba lucha den e añanan despues di gabinete Evertsz, pueblo lo a sostené Juancho Evertsz, en bes di bira lomba pa un di e mas grandi visionario ku nos pais a konosé. Bo por bisa sin mas ku si Inglatera lo no a konosé guera, e síniko sir Winston Churchill, ku su opservashonnan duru di kual mi a reprodusí algun den e kolumna di ayera, lo no a gosa di e sosten ku el a konosé.
****
Juancho Evertsz tabata hinka hopi tempu den buska informashon riba e lokualnan e tabata ke formulá un pensamentu (ta bai hopi mas leu ku meramente ekspresá un opinion riba dje) di dje. Komo un ser hopi lesá, Juancho Evertsz tabata disponé di un vokabulario sumamente amplio den mas ku un idioma. Den paisnan kaminda hende ta kustumbrá ku bisa otro kos den kara, hopi di e kosnan ku diferente hende a tuma na kurason, lo a keda sin e resentimentunan ku a rondoná nan relashon ku e gran Juancho Evertsz.
****
Den nos kultura di biba pa gana atmirashon di esnan rondó di bo (hopi no tin nada mas ku e lokual nan tin na nan kurpa), remarkenan ku tinte humorístiko i sarkástiko, ta provoká emoshonnan negativo profundo. Na Venezuela un programa manera Radio Rochela ta eksponé kosnan di bida real den un forma sumamente skèrpi i sarkástiko. Serka nos Lorito ta wòrdu korolá pa djis un chispa. Nos tin muchu hende komplehá den puestonan di poder i hopi pa falta di nivel mental i konosementu no ta komprondé ku si nan no krea notisia malu, un otro no por raportá riba dje.
****
Den kaso di e gran Juancho Evertsz nos tabata e situashon di un persona ku “superior foresight” ku pa su don visionario no tabata por a someté su mes na e direkshon di esnan ku tabata tin “draagvlak”. Tal manera entre otro e katedrátiko Frederick Hayek a skirbi, ni e sikópata (pa defisiensia mental) ni esun di mas konosementu, no por someté su mes na e “ruling coalition”.
****
Ta bini aserka, ku Juancho Evertsz tabatin hopi karakterístika di e gran sir Winston Churchill. E no tabata baha kabes pa ningun hende. E tabata pèrsistí den su pensamentu i tabata ekspresá esei irespekto e konsekuensia pa su ambiente sosial. E gran sir Winston Churchill tabata bisa: ”If you have an important point to make, don't try to be subtle or clever. Use a pile driver. Hit the point once. Then come back and hit it again. Then hit it a third time--a tremendous whack”. E gran sir Winston Churcill no tabata bèk tampoko i un otro dicho di dje tabata:”If you're going through hell, keep going”.
****
Tal bes e diferensia mas grandi den vision i muestra di e “superior foresight” di Juancho Evertsz tabata, ku miéntras e tabata mira ku mester hasi trabou analítiko konstante (motibu pa kual el a bini ku WIO), i ku mester tuma inisiativa pa krea un struktura den kual Venezuela ta un aliado stratégiko en bes di un faktor di poder influente sin mas, gobièrnunan ku a sigui a desmantelá e strukturanan di inteligensia ku Juancho Evertsz a inisiá.
****
Remarkenan krítiko i pa e forma den kual el a ekspresá nan motibu di resistensia serka hopi, riba por ehèmpel Trade Center ku el a denominá komo un “White Elephant”, tabata pasobra al final di kuenta nan tabata inkurshonnan ku ta hasibu mas dependiente en bes di oumentá bo kapasidat pa apsorbá “shock” eksterno (“resilience”).
****
Pa Kòrsou su di malu, no tabatin un desaster òf situashon realmente atverso ku lo a pone ku e masa lo a para tras di e lider visionario Juancho Evertsz di moda ku e lo por a logra ku e strukturanan di inteligensia ku el a prinsipiá lo a kria rais. Lo nos lo tabata tin un posishon mas kompetitivo i un postura di dominansia den region en bes di unu di pordiosero.
****
Laga nos no pèrdè mas tempu ku aparensia i kontemplá e realidat. Ku un komishon ta bolbe konkluí ku mester bai Venezuela pa papia ku presidente venezolano Hugo Chávez Frias ta insólito. Kiko tin ku a mehorá e posishon di negosiashon? Kiko nos ta ofresé komo balor di kambio?
****
Al final di kuenta nos ta kabando un kambio estatal ku Ulanda hañando un “dikkere vinger in de pap” sin ku sikiera nos a logra ku Ulanda ta apliká influensia pa nos serva presidente venezolano Hugo Chávez Frias. Al kontrario, nos a haña e situashon bergonsoso di un kònsùl ku a faya garafalmente ku nos dignatarionan kaminda Ulanda a papia ku nan tras di porta sera i e resultado tabata ku “ze dronken een glas, deden een plas en alles bleef zoals het was”.
****
E gran Juancho Evertsz ta bai su tumba ku e sertesa ku e si jamas de los jamases lo no a hasi nada den e posishon di mendigero. Inglatera e elevá sir Winston Churchill i nos no a konsiderá un “leerstoel”, un titulo honorario òf un minister van Staat. Mester tabata kestion di miedu i mente meskino. Mi ta insistí ku kanta su gloria i bunitesa despues di morto, ta Juancho Evertsz “onwaardig”. E tabata “wars van schijnvertoningen”.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.