MERKA, - Elekshonnan primario di India i Nort Carolina a kuminsá awe, kualnan ta klave pa e senador di Illinous, Barack Obama.
Sentronan di votashon ta habrí i ekiponan di tantu Barack Obama komo Hillary Clinton ta siguiendo e proseso ku gran ekspektativa.
E gran opstákulo ku Obama tin ku superá ta e skandal Wright.
Segun sondeonan publiká algun ora promé ku a habri e urnanan awe, e deklarashonnan di Obama su eks pastor Jeremiah Wright lo por a afekt’é mas di loke ta spera den un prinsipio.
“Wright ta manera un fantasma pa e kandidato. Aki na Indiana a tuma nota kon Obama tabata mantené su mes na defensiva i e dinamismo tabata diferente. Kasi e no ta’tin tempu pa mustra e kara positivo di su kampaña”, Mattew Tully a splika, kende ta analista polítiko di Indianapolis Star.
E aspirante presidensial demókrata Barack Obama lo midié den e elekshonnan primario di Nort Carolina i Indiana awe, den dos votashon ku lo yuda determiná si e lo sobrebibí e mala racha den su karera pa Kas Blanku i si finalmente e por vense Hillary Clinton.
Estrateganan demókrata ta kere ku e senador pa Illinois a superá e pió luna di su kampaña di e mihó manera ku por spera, dor di e atenshon ku e retórika rasial di su eks pastor a provoká i tambe Obama su propio komentarionan riba e merikanonan di pueblonan chikitu, di kendenan el a kalifiká komo hendenan renkoroso i aferá na armanan i religion.
“El a sufri un berdadero gòlpi. No tin duda di esei!”, e stratega demókrata Jim Duffy a bisa. “Pero parse e ta birando fuerte”, el a agregá.
E mayó impakto ku el a sufri tabata e gira di su antiguo predikadó, reverendo Jeremiah Wright, kende a bolbe saka na lus temanan ku Obama a kere di tin resolvé, manera e opinion ku Gobièrnu merikano a kontribuí na propagashon di vírùs di AIDS entre e poblashon afroamerikano.
Barack Obama, kende lo por bira e promé Presidente pretu di Merka si e gana e karera presidensial, finalmente mester a kibra públikamente ku Wright.
E gòlpi kontra imágen di Obama a provoká un kaida, segun sondeonan nashonal.
Un enkuesta di siman pasá di Sentro di Investigashon Pew a bisa ku su bentaha di 10 punto riba Clinton a disminuí ku un diferensia di entre 45 i 47 porshento.
Tur esaki a duna e dama senador pa New York motibunan pa kere ku e por superá e bentaha chikitu ku Obama tin riba dje den kantidat di delegado, kendenan mester determiná kua di e dos demókratanan lo konfrontá e aspirante republikano John McCain den e elekshonnan di 4 di novèmber.
E stratega demókrata Liz Chadderton a bisa ku Clinton tin opshon pa loke ta su strategia, ku ta simplemente spera sin hasi nada i konfia ku Obama lo konfrontá un problema nobo ku lo alimentá su argumento di ku e ta é demókrata mas eligibel.
Hopi analista a pronostiká un resultado dividí: Obama ganando na Nort Carolina, i Clinton ganando na Indiana.
Esaki lo nifiká ku e karera demókrata mas largu di historia ta kontinuá, pero ku Obama ta sigui situá pa optené e kandidatura.
Un dòbel viktoria pa Obama lo por bira ainda mas trankilisadó pa e superdelegadonan di e partido, kendenan por vota pa e kandidato ku nan ke den e konvenshon demókrata di ougùstùs na Denver.
Pero resultado kontrali, un triunfo di Clinton na ámbos estado, lo konfundí e panorama mas, i lo duna su siguidónan mas motibu pa diskutí ku e superdelegadonan, ku e eks Promé Dama ta e mihó kandidato pa konfrontá McCain.
Obama a rekonosé na Indianapolis ku e kiebro ku Wright tabata kontraprodusente pa su kampaña, pero e no tabata sa te na ki punto. “Mi no por bisa kon e desenlase lo bai ta”, e senador pa Illinois a bisa.
Su palabranan a duna e sensashon di ku e no ta konfia ku e lucha demókrata ta terminá pronto.
Ekspertonan a pronostiká ku si Obama gana kandidatura demókrata, e lo konfrontá un seri di problema den e elekshon general frente McCain.
“Den un elekshon general, esaki ta e mihó ku por pasa McCain”, Andy Smith a bisa, kende ta profesor di siensia polítiko di New Hampshire University.

Foto; Hillary Clinton 0605

Hillary Clinton ta papia durante “Jefferson Jackson Day Dinner” na Indianapolis.

Foto; Hillary Clinton 1 0605

Hillary Clinton ta saludá su simpatisantenan na Evansville, Indiana.

Foto: Barack Obama 0605

Barack Obama ta papia durante “Jefferson Jackson Day Dinner” na Indianapolis.

Foto: Barack Obama 1 0605

Barack Obama ta tene man di empleadonan di konstrukshon na Evansville, Indiana.

Foto: Hendenan vota 0605

Hendenan ta para den rei pa vota na un urna na Nort Carolina.

Foto: Votantenan 0605

Votantenan ta para den rei pa haña nan karchi di vota na Cameron Village Library na Raleigh, Nort Carolina.