Lo realisá trabounan investigativo na Venezuela:

WILLEMSTAD – Errol Cova a keda nombrá konsultor di sekretario general di Edukashon Internashonal (Education International) pa realisá trabounan investigativo den Latino Amérika i Karibe. E nombramentu aki ta unu haltu den kua Cova lo bai realisá investigashonnan riba tereno di enseñansa den e paisnan ariba menshoná. Den kòmbersashon ku Cova a bin dilanti ku e ta konsiderá e nombramentu importante i ku apesar ku ta trata di un nombramentu internashonal, e lo no bai biba den eksterior. Esaki ta nifiká ku den futuro Cova lo bai ta hopi den eksterior pa realisá e trabounan ku e ta wòrdu yamá pa hasi. Cova ta duna di konosé ku for di òktober su persona a keda aserká p’e federashon, miéntras ku e negosiashonnan tabata tuma lugá i na yanüari último tur kos a bira realidat. E nombramentu a drenta na vigor dia 1 di mei último.
Cova nunka a kibra ku kontaktonan den eksterior, pero a mantené esaki ku a bin konkluí na e nombramentu aki. E federashon aki ta un organisashon ku ta konta ku 30 mion miembro rònt mundu, atrabes di 394 organisashon di edukashon den 171 pais rònt mundu. E federashon aki su sede ta na Bruselas i nan kantor regional ta na San José, Costa Rica. Cova ta deklará ku e lo bai ubiká su mes den un kantor na Kòrsou ku lo haña sosten di e kantor internashonal i lo biaha pa realisá e trabounan den eksterior. E promé enkargo ta konosé ku mester hasi un investigashon na Venezuela i mester determiná den 1 luna di tempu kua ta e otro pais ku mester keda investigá.
Den e trabounan di investigashon Cova lo haña apoyo di paisnan manera Venezuela, Spaña, Mexico i Brazil. Errol Cova mester raportá direktamente na e sekretario general di Education International, apesar ku lo bai traha den konhunto ku dos profeshonal lokal riba tereno di edukashon pa e trabounan investigativo. E pedagogonan ainda no a keda menshoná, pero lo ta trata di personanan lokal pa despues di kada trabou duna reportahe na e organisashon internashonal.