Negosiashon kontrakt entre Stadsvernieuwing i Global Metals den fase final:

WILLEMSTAD – Sentro di siudat lo haña tantu meter di parker komo kámara di seguridat, na momentu ku e kontrakt keda firmá entre Stadsvernieuwing i Global Metals. Na e momentunan aki e último detayenan ta keda konkretisá pa e kontrakt pa maneho di parker den Punda i Otrabanda keda finalisá. Teniendo na kuenta ku Willemstad ta riba e lista di monumentonan Históriko di UNESCO, mester yega na un proyekto ku lo mantené e posishon di Willemstad. Informashonnan ku LA PRENSA a risibí ku Global Metals ku a haña e derechi pa tin maneho di parker i seguridat den sentro di siudat ta hasi, ku lo bai tin uso di e teknologia mas moderno den asuntu di parker i seguridat den sentro di siudat.
Primeramente mester kuminsá na splika ku e parti di parker lo no tin e tipo di meternan kustumbrá, pero lo bai na krea manera Oropa ku tin e toren di parker ku ta mara na alrededor di 12 vehíkulo. Konsiderando ku ta trata di sentro di siudat, mester tene kuenta ku e forma ku ta bai introdusí e ekiponan aki, mester ta kuadra ku e standart internashonal. Global Metals lo bai traha den koperashon ku J Mackay, ku ta un kompania establesé na Canada. E kompania aki tin añanan di eksperensia riba e tereno aki.
J MacKay tin mas di 50 mil meter di parker den sentro di siudat di New York, ademas di 30 mil na e parti West. Tambe e kompania aki a haña masha atenshon den un resiente programa di televishon den Discovery. Ya kaba ta kálkulo ku tin alrededor di 1400 lugá di parker den sentro di siudat. E meternan lo keda repartí den Punda i Otrabanda.
Pa loke ta trata e kámara di seguridat, ta unu proyekto pa vigilansia den sentro di siudat. For di momentu ku tabatin intenshon pa introdusí polis pa turismo, a presentá e proyekto aki, kua ta unu ku rònt mundu ta usa. Un kompania di renombre mundial a keda aserká pa atendé ku e parti di kámara aki. E kompania aki ta establesé na Inglatera i ku hopi otro siudat ta hasiendo uso di nan produkto. E konsepto aki pa sentro di siudat, Kòrsou lo bai bira parti di un programa spesial di vigilansia i seguridat, ku lo keda plamá den Punda i Otrabanda.
E kámaranan lo baha e preshon pa kana kontrolá i pa evitá ku na sierto sitionan pa motibu di falta di kòntròl, algu lo por tuma lugá. Visibilidat di e kámaranan aki ta trese seguridat bou di e komunidat i pa garantisá protekshon pa e turistanan. Segun LA PRENSA e proyekto di kámara di vigilansia den siudat ta unu ku mayoria di pais tin i ku a duna benefishinan grandi pa e pais. E kámaranan lo keda instalá pa e kompania G 4 di Inglatera i ku hopi otro pais ta usando nan kámara komo modelo.