YANGON, Myanmar, - Mas ku 22.000 persona a muri i 41.000 hende ainda ta pèrdí komo resultado di e siklon violento ku a devastá delta di Irrawaddy na Myanmar (Birmania), outoridatnan a bisa awe, kendenan a atvertí ku sifra di víktima por sigui oumentá.
Sifra di morto kousá pa e devastador siklon Nargis na Myanmar no ta stòp di oumentá.
Awor, outoridatnan a informá ku tin 22.464 morto.
E último relato ofisial transmití pa televishon estatal birmano riba e tragedia ta añadí ku tin mas o ménos 41.000 persona pèrdí.
Aktualmente organisashonnan humanitario ta tratando di gana akseso n’e pais pa desplegá un operashon di gran eskala.
E promé lote di yudansa a yega prosedente di pais bisiña Tailandia.
Promé, Minister di Asuntunan di Eksterior, Nyan Win, a bisa na televishon estatal ku solamente na siudat di Bogalay 10.000 persona a muri ora a anunsiá e promé rekuento detayá di e pió siklon ku a sakudí Asia fo’i aña 1991, ora 143.000 persona a pèrdè nan bida na Bangladesh.
Minister di Asuntunan Eksterior di Tailandia, Noppadol Pattama, a bisa despues di un reunion ku Embahador di Myanmar na Bangkok ku a inform’é ku mas o ménos 30.000 persona ainda ta pèrdí despues di e tormenta devastador di djabièrnè último.
“E pèrdidanan ta muchu mas grandi di loke nos a antisipá”, Noppadol a deklará despues ku Embahador Ye Win a ninga papia ku periodistanan.
Total di persona ku a pèrdè nan kas despues di paso di siklon Nargis, ku a sakudí Myanmar ku bientunan di 190 kilometer pa ora i áwaserunan torensial, tabata yega mas ku shen mil, responsabelnan di Nashonnan Uní a bisa, i esaki por oumentá bira miónes.
Eskala di e desaster a kondusí ku e hunta militar ku ta goberná e pais a aseptá yudansa estranhero, algu ku e Gobièrnu a ninga ora a produsí e tsunami devastador den osean Índiko na aña 2004.
Di e manera aki a duna lus bèrdè na e preparashonnan na diferente pais.
Pero ainda no sa ku lo pèrmití yudansa ofresé pa Washington.
Bernard Delpuech, un responsabel di yudansa humanitario di Union Europeo na Yangon, a bisa ku e hunta a manda tres barku kargá ku alimento na region di e delta, un volúmen insignifikante pa un pais ku ta konta ku un poblashon di 53 mion persona.
Kasi mitar di e poblashon birmano ta biba na e sinku estadonan gòlpiá pa e siklon.
E lista di morto i hendenan pèrdí siudat pa siudat anunsiá pa Nyan Win a mustra ku te ku awor aki a konta 14.859 morto na e region Irrawaddy i 59 na Rangun, e eks kapital birmano di 5 mion habitante.
Na Rangun, personanan tabata para den reinan largu pa kumpra bòternan ku awa, i ainda no a restablesé servisio di koriente kuater dia despues di paso di e siklon.
Petishon di Laura Bush
Merka a ofresé oumentá yudansa na Myanmar si e régimen militar duna akseso n’e ekiponan di e pais aki ku e meta di hasi un balans mas detayá di e situashon.
E Promé Dama di Merka, Laura Bush, kende a mustra hopi interes den loke ta okurí na e pais aki, a pidi Myanmar pa aseptá 250.000 dollar ku ya a keda destiná pa e emergensia aki i a sigurá ku lo por manda mas sèn si pèrmití entrada di ekipo di reskate n’e pais.
Tambe el a akusá outoridatnan birmano ku nan a faya, pasobra nan “no a atvertí na tempu” riba yegada di e siklon.
Di su banda, Organisashon di Nashonnan Uní a informá ku míles di birmano a pèrdè nan kas i ku nan no tin akseso na awa potabel.
Míles di sobrebibiente di siklon Nargis ta sin awa, sin koriente, i no por haña informashon riba e situashon.
E yudansa ainda no a yega na hopi region di e pais i hopi persona afektá ta kritiká e lentitut den kontesta di e outoridatnan.
Na sinku provinsia, ku mas o ménos 24 mion habitante, a deklará estado di emergensia.
Siman pasá djasabra, siklon Nargis a asotá Myanmar ku bientunan di asta 190 kilometer pa ora.
Den promé oranan di ayera djaluna, sifra di morto tabata 350, pero mas lat medionan di komunikashon estatal a informá ku víktimanan fatal a oumentá bira mas ku 4.000.
E saldo a bolbe multipliká dramátikamente ku deklarashonnan di Win, kende a duna Konferensia di Prensa huntu ku Promé Minister i Minister di Informashon birmano.
Asistensia humanitario
Sekretario General di Nashonnan Uní, Ban Ki-moon, a bisa di ta alarmá pa e desaster i el a komprometé su mes pa hasi tur posibel pa Myanmar.
“Komo promé paso, Ofisina di Kordinashon di Desaster i Asistensia ya ta organisando i ta na espera di presta asistensia si rekirí esaki”, el a bisa.
E pueblonan di Bogalay i Laputta, na region di Irrawaddy, ta mas afektá.
Mas o ménos 80% di Laputta a keda destruí, i reskatistanan ainda no por yega n’e sobrebibientenan.
Informashonnan yegá for di Rangun a indiká ku míles di edifisio a keda tumbá te na fundeshi, palunan di koriente ta destrosá i hopi palu di mata a keda ranká for di nan rais.
Kayanan ta blòkiá i no tin suministro di awa potabel.
Funshonario di asistensia humanitario di Nashonnan Uní, Richard Horsey, a splika ku ta imposibel kalkulá eksaktamente kuantu persona a resultá damnifiká pa magnitut di e kamindanan destrosá i den sistemanan di komunikashon.

Foto: Myanmar siklon 0605

Un hòmber sintá bou di palu di mata ku a kai pa motibu di e siklon devastador na Yangon.

Foto: Myanmar sikon 1 0605

Un hòmber ta kana pasa banda di un “booth” di telefòn destruí na Yangon.

Foto: Myanmar siklon 2 0605

Hòmber sintá bou di un “billboard” ranká for di suela na Yangon.

Foto: Turistanan Myanmar siklon 0605

Turistanan na Yangon ta kana pasa banda di un palu di mata ku a kai.

Foto: Myanmar siklon 3 0605

Un mucha muhé na Yangon ta kana pasa banda di un stashon di bùs destruí p’e siklon.

Foto: Soldanan tailandes 0605

Sòldánan tailandes ta hinka kahanan di promé nesesidat den avion militar di Tailandia na aeropuerto militar na Bangkok, pa hiba p’e víktimanan di e siklon devastador na Myanmar.

Foto: Habitantenan Myanmar 0605

Habitantenan na Yangon ta sinta na un stashon di bùs entre ruinanan.

Foto: Laura Bush 0605

Promé Dama di Merka, Laura Bush, ta papia riba situashon na Myanmar den “pressroom” na Kas Blanku.

Foto:Ban Ki-moon 0605

Sekretario General di Nashonnan Uní, Ban Ki-moon, a bisa di ta alarmá p’e situashon na Myanmar.