Durante gobernacion di AVP
Segun Gobierno di MEP

ORANJESTAD- Den e ultimo dianan aki constantemente nos por tende di politiconan frustra di AVP ta critica y cuestiona e asunto di Dump na Parkietenbos y en especial pa loke ta e di dos fase di e proyecto aki, esta e ‘Solid Waste Management Facility’. E mesun criticanan destructivo aki partido AVP a lansa durante ehecucion di e promer fase di e proyecto di Dump. Sinembargo den tur e letania di entre otro Benny Kilowatt di AVP nunca nos di MEP por a tende su opinion pa loke ta resultado di e promer fase di e proyecto aki.
Hecho ta cu durante henter e 10 aña di gobernacion di AVP, esta di 1986 pa 1988 y di 1994 pa 2001 nunca nan a yega di haci algo drechi pa sana e situacion ahigienico y insaludabel cu tabata reina na e Dump aki y cu pa decadanan largo tabata un fuente di maleza y sushedad hamas visto den historia di e pais aki..
Mester a warda te na momento cu Gabinete Oduber III na final di 2001 a tuma rienda di e pais aki pa nos por a mira algo sumamente positivo sosode den e area aki.
E gobierno actual bao di Minister drs. Booshi Wever a percura pa paga e candela riba e Dump na Parkietenbos y cual candela pa decadanan largo a manda humanan venenoso den henter e area aki. Ta danki na e maneho dinamico di e gobierno actual awe e barionan di Parkietenbos, Kas di Paloma y Buena Vista no conoce sushedad, contaminacion di tera y aire, presencia di muskita vies, djaca y cacalaca matroos mas. Tur esaki no ta wordo treci padilanti door di e politico di Pabao, cu nunca a corda riba e habitantenan den e area di Parkietenbos, ya cu su pensamento solamente tabata bay na con ta pone lijm riba meter di coriente y p’asina den forma flagrante horta coriente di Elmar. Un otro ehempel cu nos por duna di e dinamismo pa loke ta e maneho di medio ambiente ta loke tur a sosode na Jaburibari. Durante gobernacion di AVP un dump ilegal a wordo crea na Jaburibari y tur e habitantenan den e area aki a sinti inmediatamente e efectonan devastador di e dump aki. Un biaha mas ta danki na Gabinete Oduber cu awe e sitio di e dump aki a wordo converti den un Parke deportivo y recreativo sumamente bunita y luhoso y cual joya di parke a haya admiracion di henter comunidad Arubano y tambe di esnan di Cas Real.
Tur esakinan ta logronan positivo cu no por wordo capta pa mentenan chikito, destructivo y vengativo di politiconan di AVP cu no kier mira kico un gobierno social democrata a haci riba tereno di medio ambiente.
Partido MEP no kier papia mes di Serlimar cu durante gobernacion di AVP a wordo trata manera un pashent cu ta den fase terminal. Matando e compania estatal aki e gobierno di Ready Kilowatt kier a trece e famoso compania Aruba Bunita N.V. y p’asina nan por logra aloca nan ‘family and friends’ den e compania aki. Por lo demas Serlimar lo por wel di sangra te muri numa, ya cu e gobierno di AVP durante 7 aña no a cumpra ningun truck di sushi nobo y te hasta no tabata hinca ningun cen pa lapi e tirenan di e autonan di sushi existente!
Ta pesey e partido cu menos mester papia riba asunto cu ta regarda medio ambiente ta e partido malvado AVP, cu den nan trayectoria tabata traha solamente pa beneficio propio y familiar.