WILLEMSTAD – Un káos enorme den tráfiko, tabata resultado di trabounan di rekonstrukshon di vangreel riba brùg Juliana ayera tardi. E trabounan akí, kombiná ku e trabounan di rekonstrukshon di kaminda na Rio Canario, a sòru pa filanan largu na diferente parti di Kòrsou.
Pa algun tempu kaba algun parti di e vangreel riba brùg Juliana a kai riba kaminda debí na aksidentenan di outo. LA PRENSA mes a mustra riba e urgensia pa drecha e vangreelnan. Ayera D.O.W. a mobilisá un kontratista ku a kuminsá ku e trabounan di reparashon. E trabounan a kuminsá den oranan lat di mainta. i a dura te sigur 12’or di mèrdia. Sin embargo e empleadonan di e kontratista a bai lùnch mèrdia, lagando un situashon hopi peligroso na e sitio. Por a nota partinan skèrpi di vangreel ku no tabatin ni sikiera pion pa alertá outomobilistanan. Pa 2’or di mèrdia no tabatin niun empleado di e kontratista na e sitio. Na momentu ku nan a reanudá trabou, ya nan a pèrdè hopi tempu kostoso ku nan por a usa pa kaba e trabou promé ku 5’or di atardi. Entretantu filanan largu a forma for di altura di Amstel Brouwerij te riba brùg Juliana.
Ta bin aserka ku e trabounan di rekonstrukshon di kaminda na Rio Canario, a pone ku masha dia hopi outomobilista ta skohe pa pasa rònt Schottegat via brùg Juliana. Ayera tur e outomobilistanan akí a keda pegá. Miéntras tantu tráfiko a pega riba Gosieweg for di altura di Radio Krioyo te na Kraamkliniek.
Mester konstatá ku D.O.W. a opta pa drecha e vangreelnan riba brùg, kousando filanan largu, sabiendo ku e trabounan na Rio Canario ya ta okashoná fila. Polis tampoko a reakshoná na tempu riba e káos ku a surgi den tráfiko ayera tardi. Ta te den lat ora ya e filanan riba brùg a kuminsá klara, polis a bai tira un bista.