WILLEMSTAD – Un tata i su yu chikí a stek awe mardugá den nan kas, dor di huma kousá pa un kandela. E tragedia a tuma lugá den kareda di 4’or den Totolikaweg na Cas Cora. E tata tabatin 40 aña i e yuchi 3. Siman pasá dia 30 di aprel tambe un dama a muri ora su kas a pega na kandela.
Na momentu ku e kas a pega kandela awe mardugá, den promé instante, tantu e mama e tata i un beibi di apénas 1 aña a logra sali for di e kas. Pero na momentu ku e tata a nota ku e yu hòmber chikí a keda den e kas, el a opta pa bai bèk paden pa buska su yu. Tin indikashon ku e plachinan di geps ku kua e interior di e kas ta konstruí, a kousa un konsentrashon inmenso di huma ku a stek e víktimanan. Segun informashonnan ku LA PRENSA a kompilá, e víktimanan no tabatin hopi kemadura. Esaki en todo kaso por ta indikashon, ku en bèrdat nan a muri dor ku e huma a stek nan. Na momentu ku e tata a bai bèk paden, e vlamnan no tabata dje intenso ei. Pero ora e kier a sali esaki for di e mesun ruta esaki a resultá imposibel. Intentonan pa sali for di bentana di e kamber no a logra, ya ku e bentana tabata sigurá ku hèkwèrk.
LA PRENSA a komprondé, ku awe mardugá ora e agensia funeraria a yega na e sitio pa bai ku e restunan mortal, esaki no por a tuma lugá. Parse ku dor di e inmenso kayente, e efektivonan di TOD no por a drenta den e kas pa tuma nota di e promé detayenan ku ta importante pa sobrá di e investigashon. Konsekuentemente no por a bai ku e víktimanan tampoko, ya komo ku ta nesesario pa TOD hasi su investigashon ku e víktimanan na e sitio. Mas lat mainta ora esaki a tuma lugá, e agensia funeraria a bin bèk pa buska e restunan mortal di e tata i su yu. Mes ora a hiba nan krematorio pa e proseso di despedida por a tuma lugá.
No ta konosí ainda kiko tabata e kousa di e kandela, ounke ku tin spekulashon ku probablemente ta trata di un bela ku a kousa e kandela. Den e kas tabata biba un famia Hindú. E tata ku a fayesé yama Ashok Chelani i e yu Armand Chelani. Ta trata di un famia Hindú ku tabatin un negoshi den Colon. Anteriormente e tata tabata traha na Casa Radiante.
Siman pasá djarason tambe tabatin un kandela di kas ku a kousa morto di un dama di edat. Un eksploshon di un bòm di gas chikí tabata kousa di e kandela.