NEW YORK – Alex Rodriguez a bai for di dje durante di nasementu di su promé yu muhé.
“Un verpleegster tabatin un paña friu na su kabes, un otro tabata koge su preshon i mi mama tabata frega su lomba i e tabata for di dje riba un sofa. Ami tabata dunando lus”, asina Cynthia Rodriguez, kasá di Alex a bisa den e programa YESterdays ku lo pasa na YES Network awe nochi.
“Realmente mi no tabata paga muchu tinu na dje, ya ku mi tabata bezig ku e dòkter i verpleegsternan ku tabata huntu ku mi”, asina Cynthia a bisa. “E tabata keña, miéntras ku ami tabata pusha i tabata puntr’é: “Dushi, bo ta bon? Dushi, bo ta halando rosea? Bo ta oké?”
Natasha Rodriguez a nase dia 24 di novèmber 2004.
“Mes tòf ku e ta mustra i ta slap ora ku e mester bai dòkter”, asina Cynthia a bisa di akuerdo ku pidanan ku nan a saka ayera for di e programa di YES.”Meimei di anochi mi a lant’é for di soño, i a bis’é ku e mester bai hospital. E promé kos ku el a bisa ta, ku si e mester yama mi mama. Algun ora despues el a yama mi mama”.
Siman pasá Alex a biaha for di New York pa Miami i a yega 10 minüt despues ku su yu muhé Ella Alexander Rodriguez a nase dia 21 di aprel.
Alex a sera konosí ku Cynthia den un gym na Miami.
“Mi a sigui su pasonan durante di un luna largu. Mi tabata kier a mira su rutina, ki ora e ta yega kon konsistente e ta. E tabata manera un mashin e tabata yega for di trabou subi “treadmill” i despues hasi su ehersisionan di buikspier. Despues di tres siman i mei mi a haña sufisiente kurashi i a puntr’é si mi por hasi ehersisionan di buikspier huntu kuné”.
Cynthia no tabata sa ken e ta.
“Mi tabata sa ku e ta hunga beisbòl, ya ku tur hende tabata bisa esei. Mi famia no tabata den deporte. Mi a bisa e ta hunga beisbòl. Kiko mas e ta hasi, ki su hòbi lo ta”, asina Cynthia a bisa.