Skina di Sorti, awe djarason 7 di mei di 2008, ta kuminsá ku deseá tur hende un bon dia. Ku un hende ta terko, no nesesariamente ta malu. Pero na momentu ku e terkedat ta bai kompañá ku ningamentu di realidat (e konosido fase di “denial”), e persona ta konvertí su mes den un peliger pa su alrededor. Bo ta haña un situashon kaminda defendementu di un posishon tuma ta bira un ophetivo apsoluto. Den nos realidat polítiko, bo ta topa hopi hende ku ta den e situashon menshoná.
****
No tin otro manera pa splika e situashon di kosnan inefektivo ku ta sosodé den nos práktika polítiko. Tantu den seno di koalishon komo den seno di oposishon tin akshonamentu ku bo por katalogá komo manifestashon di e realidat sosio polítiko, pero ku pa lokual ta e papel ku polítika tin di hunga den mehoramentu di kondishon general di bida den pais, simplemente un desperdisio di rekurso.
****
Entre esnan ku ta praktikando polítika, tin diferente hende ku un preparashon ku ta laga espasio pa espektativa di un aserkamentu metódiko di kualke asuntu. Tòg un grupo ku dia pa dia ta bira mas grandi, entre kual hopi hende ku simpatia pa diferente dje polítikonan, ta puntra nan mes ta pasikiko tin di bai urna.
****
Lokual ta wòrdu definí komo “electoral fraud” (engaño di elektorado dor di krea un persepshon durante di kampaña ku despues bo no ta kumpli kuné), entre otro a sosodé ku formashon dje aktual konstelashon gubernamental. Asina ku “botsende bestuursculturen” ta bira aliado, integridat polítiko ta bini bou di preshon fuerte. Mi a skirbi na algun okashon ku den Bestuurscollege di Kòrsou tin masha hopi okashon di un gobièrnu ku ta papia ku dos lenga.
****
Riba tereno di nombramentu di gerente den empresanan estatal, Bestuurscollege a hasi su mes totalmente inkrédulo. Promé ku a forma e koalishon aktual tabata profesá un kos, despues ku a forma tabata papia un otro kos i na momentu ku desishon mester a kai, kos a bira totalmente intransparente. Awe nos mester konstatá ku Bestuurscollege no tin posishon riba nombramentu den empresanan estatal. Mester konstatá ku ta hasi lokual ta nesesario pa no kousa un kiebro di e koalishon.
****
E manera ku a bini ta trata e asuntu di desaroyo di e área di Rif, ta otro muestra di falta di maneho. Bestuurscollege aki ta papia atrobe ku dos lenga. Unu di diputado Anthony Godett i otro di diputado Eugène Rhuggenaath. Pues Bestuurscollege no ti maneho, ni posishon. Lokual ta hasi aki tambe ta nada mas ku lokual ta nesesario pa no kousa kiebro di e koalishon.
****
Un koalishon ku a wòrdu formá únikamente pa pasa e “Slotverklaring”. Pero awor aki, e “Slotverklaring” ta un stashon tras di lomba. Tin retonan grandi nos dilanti pa kual e “Slotverklaring” no ta brinda solushon. Presupuesto pa kual e “Slotverklaring” i e kompromisonan finansiero lo mester a sirbi komo instrumento mes ta mal pero mal pegá. Opviamente nos hendenan no ke komprondé ku e “Slotverklaring” ta mas un parti di un plan stratégiko ulandes ku e ta parti di un plan di nos.
****
Un biaha mas mi ta referí lektornan na e presupuestonan ulandes kaminda nan ta skirbi literalmente ku nan ta bai usa e proseso estatal pa haña mas influensia riba gobernashon antiano. Pa mantené aparensia por keda ninga esaki, pero e ta un bèrdat. Ku kosnan te awe no ta kanando manera debe ser den e proseso estatal tambe no ta un sorpresa. E proseso no ta bou di nos “regie”. Nos ta sigui i e ulandesnan ta dirigí.
****
Hende kuerdo por laga di gusta ku un otro ta siñ’é algu, pero pa progresá semper bai e mester ta dispuesto pa siña. Un gobernante por enkontra difikultat pa proyektá futuro, pero por lo muy ménos e mester tin e disposishon pa wak padilanti. Serka nos, bo ta ripara ku no ke siña nada i no ta trata tampoko di proyektá futuro. No ta antisipá riba nada. Te hasta ora ku trompeká riba un bèrdat, ta lanta para i sigui move den e mesun kaminda komo si fuera nada no a pasa.
****
For di kabamentu di aña nos a alertá, ku kontrali na e proyekshonnan alentador ku hopi, entre kual gobernantenan, tabata hasi di futuro, nubianan pisá tabata formando i ku kreamentu di perspektiva alentador na komunidat tabata iresponsabel. Awor ku nos proyekshon ta un realidat amargo mes, gobièrnu ta sigui ku e mesun aktitut di krea e impreshon eróneo di ta den posishon pa evitá e impakto di e desaroyonan global.
****
Despues di desperdisiá rekursonan skars di pais ku por ehèmpel fondo di energia, tin kestion di redusí entrada di gobièrnu, miéntras ya kaba tin buraku grandi pa tapa. Gobernantenan ta persistí den un maneho di bende komunidat “gebakken lucht”. Diputado Mike Willem MBA tin di wak kon pa kubri un défisit ku despues ku a anunsiá di tin un “dekkingsplan” a bira mas grandi ainda.
****
Un “dekkingsplan” manera mi a splika na algun okashon no ta lokual a keda presentá anteriormente. Den un “dekkingsplan” (no brua esaki ku un plan di ousteridat), bo no ta fiha riba kosto pero riba efektivo (“begrotingsposten”). Bo ta wak prinsipalmente den direkshon di entrada, obligashon riba término korto (ku bo por konbertí den obligashon di término mas largu) i bienes ku bo por konbertí di den “cash”.
****
Pero miéntras ta papia di un “dekkingsplan” ta papia den mesun momentu di kòrta den entrada di gobièrnu (redukshon di impuesto) pa un supsidio general di kosto di energia. E úniko kos sensato ku mi a skucha ta for di minister di Finansa drs. Ersilia de Lannooy ku a bisa ku kontal ku e lokual Bestuurscollege proponé ta “budget neutraal” nan por dal bai numa.
****
E bon entendido ta komprondé mesora ku e minister a bisa ku lokual Bestuurscollege ta proponé ta imposibel. Lokual ami ta konsiderá mas remarkabel ta ku kontrali na e lokual a bisa ku lo no sosodé mas, aktitut sigur di Bestuurscollege di Kòrsou ta di sigui e mesun filosofia polítiko “zoete koeken bakken” ku a hinka nos den e problema ku nos ta. En bes di aserka komunidat ku e realidat ta skohe e kaminda di ménos resistensia.
****
Laga mi ripití pa di tantísimo bia. Nos no por evitá “bloed, zweet en tranen” si es ku nos ke duna nos nietunan un mihó futuro. Na Ulanda drs Jan Peter Balkenende a hiba un maneho di drecha e dak ora ku e tabata mira solo. Nos ta ketu bai den wega di kompa Nanzi. Nos ta kere ketu bai ku di bon semper ta aparesé. E realidat ta ku kosnan por bai di malu pa hopi mas peor.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.