MOSKU, Rusia, - E vensedó di e elekshonnan presidensial ruso di 2 di mart último, Dmitry Medvedev, di 42 aña, awe a asumí komo Hefe nobo di e Estado durante un seremonia sòlèm na Gran Palasio di Kremlin di Mosku, dilanti 2.000 invitado.
Televishon ruso a transmití e seremonia bibu i direkto.
Ku e kambio di poder na Kremlin, e Gobièrnu ruso outomátikamente a renunsiá.
E antesesor di Medvedev, Vladimir Putin, di 55 aña, mañan djaweps lo keda eligí komo Promé Minister nobo.
Putin, di kende e Konstitushon ruso a strob’é ehersé un terser mandato presidensial konsekutivo, tin sigurá su elekshon komo Hefe di Gobièrnu na Duma, ya ku e aktual eks Presidente ta dirigí e partido Rusia Uní, ku ta konta ku un mayoria di dos terser den Kámara abou di Parlamento ruso.
Putin i Medvedev ta pretendé goberná Rusia konhuntamente den próksimo añanan, ounke ainda no ta kla kon lo repartí e poder.
E ekspertonan ta kere ku Medvedev lo pèrmití Putin sigui dirigí destino di e Federashon Ruso.
Putin i Medvedev a traha huntu durante mas ku dies aña i nan a konosé otro ora ámbos a okupá kargonan den Gobièrnu di Sint Petersburg.
Medvedev, kende a presentá durante e kampaña presidensial komo un polítiko liberal, a gana e elekshonnan di 2 di mart último ku 70,28 porshento di e votonan.
Medvedev awe a bira e di tres Presidente di Rusia for di fin di Union Soviétiko, despues di Boris Yeltsin i Vladimir Putin.
“Mi ta hura respetá i protehá derechonan i libertatnan, respetá i defendé Konstitushon di Federashon Ruso, defendé soberanía i independensia, seguridat i integridat di e Estado, sirbi e pueblo fielmente”, Medvedev a afirmá ora el a hura ku man riba un ehemplar di Konstitushon, dilanti Putin (su predesesor i mentor), tambe dilanti e mas ku shen invitado.
Despues, e Presidente flamante a afirmá ku prioridat di su mandato ta kontinuá ku desaroyo di libertatnan síviko i ekonómiko.
El a plantia e ophetivo di kombèrtí e pais den “un di esnan mihó di mundu”.
El a bisa ku p’esaki e lo konta ku “apoyo” di Putin, di kende e lo nombra komo Promé Minister.
Despues di e huramento, Presidente di Tribunal Konstitushonal, Valeri Zorkin, a proklamá Medvedev komo Hefe nobo di e Estado, i un orkesta a toka e Himno nashonal.
Poko promé, Putin a bisa ku Rusia “a avansá” durante su ocho aña di presidensia i e ta deseá su susesor “bon suerte”.
Yamada di Putin
Eks Presidente Vladimir Putin awe a urgí pa kontinuá ku polítika di desaroyo ekonómiko di Rusia ku mira poné riba bienestar sosial i fortalesimentu di su protagonismo internashonal.
Ora el intervení komo mandatario saliente n’e entrega di podernan na su susesor Dmitry Medvedev, el a bisa ku e ta konvensí di ku solamente asina e Estado lo yega tin un kara sosial i ta lider mundial.
Ta ekstremo importante, Putin a suprayá, sigui e kurso poné na prueba den último añanan animá den interesnan di siudadanonan ruso.
El a afirmá ku konkluí su fakultatnan presidensial, e obligashon di kuida Rusia tabata i lo sigui ta e deber síviko mas haltu.
Pa Putin, moral di outoridat ta garantia prinsipal di konfiansa di e personanan, i no ta ménos importante ku eksperensia i profeshonalismo.

Foto: Dmitry Medvedev 1 0705

Dmitry Medvedev ku su man riba un ehemplar di Konstitushon ta hura komo Presidente nobo di Rusia na Kremlin awe.

Foto; Svetlana i Dmitry Medvedev 0705

Presidente nobo di Rusia, Dmitry Medvedev, man drechi, huntu ku su esposa Svetlana durante seremonia na Katedral di Kremlin awe, despues di e seremonia di inougurashon.

Foto: Dmitry Medvedev 0705

Presidente nobo di Rusia, Dmitry Medvedev, meimei, durante seremonia di inougurashon.

Foto; Vladimir Putin 0705

Presidente saliente di Rusia, Vladimir Putin, man robes, na kuminsamentu di e seremonia di inougurashon pa Presidente eligí Dmitry Medvedev, man drechi.