WILLEMSTAD – Ayera a tuma lugá na Fundashon Adelanto Rooi Santu entrega di e Buki di Bario. Manera ta konosí Sentro pa Konosementu Sosial a start ku un proyekto piloto pa yega na un Buki di Bario. E buki aki mester yuda elevá konsenshi históriko inkluso hasi e suidadano alèrta di situashonnan den bario ku e ta biba aden. Inkluso yega na formulashon di meta i vishon. A produsí tres buki pa e zonanan di Berg Altena, Otrabanda i Rooi Santu.
Pa e okashon aki tabata presente diputado di Asuntu Sosial, Humphrey Davelaar. Pa e diputado ayera tabata un dia spesial, un dia históriko-sosial, kaminda Sentro pa Konosementu Sosial, ku ta kai bou di su responsabilidat, a kompilá e promé resultadonan di Profil di Bario. E resultadonan sistemátiko i sientífiko, ta keda presentá den forma di un buki. Ku e datonan aki tur aktor den un bario por bai traha na un manera dirigí i profeshonal riba e situashon di bida den bario.
Profil di Bario ta un forma efektivo i efisiente pa atendé ku forsanan i nesesidatnan di bario i pa trata na mehorá aserkamentu, duna struktura básiko i traha na unidat den barionan.
“Komo Diputado enkargá ku e kartera sosial, huntu ku habitantenan di kada bario, nos mester purba trese seguridat, trankilidat i alivio den e ambiente sosial di bario,” asina Davelaat a trese padilanti.
Dor di e profil di bario Gobièrnu ta sigurá ku tin informashon di barionan riba nos dushi isla Kòrsou, asina ta purba konsientisá tur hende riba situashon di bida den bario i ku kada hende por biba un bida dushi, digno i di kalidat den su bario.
“Aki mi ta referí na e ambiente sosial di barionan, ku ta enserá infrastruktura sosial, seguridat sosial, pobresa, limpiesa i desaroyo sosial kompletu di e hende. Konsientisashon di e hende den su bario ta hopi importante, sin ke lubidá e orguyo personal, di ta forma parti di un bario.”
E diputado a sigui bisa ku e ta kere pa krea un ambiente sosial den bario, e 3 puntonan di lansa ku ta regardá e sektor di Salubridat Públiko i Desaroyo Sosial, ta fortifikashon di famia, seguridat sosial i prevenshon integral, esakinan sigur mester haña atenshon den e barionan.
“Ora nos ta papia di fortifikashon di famia, nos ta papia di famia, bisiña i demas habitante(nan) kaminda Kòrsou ta UN FAMIA GRANDI ku su barionan. Kòntròl sosial semper a yuda den diferente bario(nan) pa sostené otro, prevení kosnan robes òf negativo i promové desaroyonan positivo i provishonnan sosial den bario.”
Gobièrnu di Kòrsou ta kontribuí na desaroyo sosial di barionan. Ta posibel pa papia di bario, sin ku nos tin un bista amplio dje bario(nan). Ke men nos mester sa kon e bario(nan) tabata ayera i ta awe, i alabes wak kon e desaroyo di e bario lo mester ta den futuro.
Pa e motibu aki Sentro Pa Konosementu Sosial a kuminsá kompilá informashon i awe por presentá esaki na habitantenan di e barionan konserní pa krea barionan saludabel i bibabel.
“Mi ta konvensí ku e informashonnan den e bukinan di bario aki lo aportá na un manera signifikante na desaroyo di barionan aki na Kòrsou. Por último ta bon pa mi ekspresá palabranan di elogio den direkshon di tur esnan ku a base di idealismo ta sigui dediká nan mes na trabou di bario i den bario. Esaki ta konta pa tur aktor den e área aki. Danki di kurason na nòmber di nos Barionan i Gobièrnu di Kòrsou,” asina diputado di Asuntu Sosial, Humphrey Davelaar, a finalisá bisando.