WILLEMSTAD – Plataforma KoHeHe ta boga pa logra un hubentut sano mester kontrarestá pobresa den su totalidat. Ku esaki Plataforma KoHeHe ta indiká ku e hóben ku konfiansa propio, e hóben ku ta tuma inisiativa pa yuda otro, pa yuda nan mes, ku ta ekspresá nan ideanan liber. Un ku stima naturalesa i ta konsiente di balor pa ku naturalesa ku ta dispuesto na yuda kuida e naturalesa.
Plataforma KoHeHe ta pidi pa ban promové kuido, amor i responsabilidat bou di e hubentut ku yudansa di naturalesa. Un Kòrsou ku hendenan ku ta orguyoso di nan lugá i ku ta yuda mantené naturalesa rondó di nan. Asina por krese un Kòrsou mas saludabel i dushi. Kòrsou su desaroyo ekonómiko mester kana huntu ku kuido di naturalesa. Plataforma KoHeHe ta kere ku a pèrdè hopi mondi, seru, ets. Ku mas kreatividat i inteligensia mester por logra skohe un tipo di desaroyo kaminda ta tene kuenta ku naturalesa i tòg krea aktividatnan ekonómiko.
Plataforma KoHeHe ta kere ku tipo di aktividat ku no ta afektá airu, tera, laman i kosta mester enfoká riba aktividatnan ekonómiko ku ta basa riba hende bon formá i eduká. Pa un desaroyo ekonómiko i desaroyo sosial duradero edukashon ku ta prioridat. Plataforma KoHeHe ta konsiente ku muchanan den pobresa pa ku alimentashon difísilmente por keda eduká. Pa e motibu aki Plataforma KoHeHe ta siña muchanan kon pa produsí nan mes kuminda.
Traha den kunuku (plantashon) i siña muchanan kon pa sembra simia pa por kosechá fruta i berdura despues. Asina aki por promové kuido, amor i responsabilidat bou di e muchanan ku yudansa di plantashon di berdura i fruta. Si muchanan tin e tres balornan aki dominá, despues ku nan ta hóben/adulto, nan lo ta hòmber i muhénan ku ta kuida nan mes i otro hende. Tin amor pa nan mes i otronan tambe nan lo ta hòmbernan i muhénan responsabel pa asina nan gana konfiansa di otro hendenan rondó di nan.
Plataforma KoHeHe ta konsientisá muchanan ki balor plantamentu di fruta i berdura tin pa ku nan salu, desaroyo ekonómiko, balor di seú, ets. ku lo evitá ku e kultura ta keda lubidá i neglishá bou di muchanan.
Tambe e kuido sosial, kuido di e medio ambiente ta otro pilar di un komunidat duradero. Negligensia di esaki ta resultá den mas miseria i frustrashon pa pueblo. Plataforma KoHeHe ta di opinion ku tur loke ta deskribí aki riba ta e kondishon pa un bon maneho i bon komportashon pa ku e kultura i hubentut.
No por mira kuido pa ku naturalesa lòs for di bida di hende, no por mir’é lòs for di aspektonan sosial, edukashon, salubridat, alimentashon, kultural i ekonómiko di komunidat.