WILLEMSTAD – Si no bin un desishon di gobièrnu riba oumento di preis di gasoil, gasolin i fuel awe, por spera ku Curoil lo aktua, pa asina evitá ku e kompania aki ta sigui enfrentá situashon delikado. E mas di 100 mion florin di pèrdida ta hasi, ku no por evitá un oumento drástiko di preis di kombustibel riba merkado lokal. Ta konosí, ku for di 2004 kaba Curoil su preis riba kombustibel no ta esun real di merkado, ya ku atraves di e añanan, preis ta sigui subi, miéntras ku e adaptashon no ta fiha riba e diferensia real pa yega na e preis ku e mester ta.
Den kombersashon ku direktor di Curoil, Gensley Capella a splika LA PRENSA, ku no por antisipá nada ainda, ya ta warda riba e desishon ku mester tuma lugá awe, den kua BC mester anunsiá kua ta e rekomendashon di DEZ pa un oumento nobo. Echo ku ta pèrdiendo 7 mion florin pa luna i ku a akumulá mas di 100 mion florin ta hasi e kompania Curoil delikado. Capella ta puntra kua negoshante ku kumpra un produkto ku bende esaki mas barata ku e ta kosta, lo por sobrebibí. Esaki ta nifiká, ku Curoil tampoko lo por logra ku esaki.
Capella ta mustra, ku e status di diferensia entre e preis real di gasoil ta 70 sèn i gasolin ta 40 sèn. Esaki ta nifiká, ku Curoil ta bendiendo gasoil ku 70 sèn mas barata i gasolin 40 sèn mas barata. Curoil a bin ta bende strukturalmente bou di preis for di 2004 i ku tin konsekuensia awe. Capella ta duna di konosé, ku na televishon awe mainta a komprondé, ku gobièrnu lo tuma desishon riba preis, despues ku ayera tabatin diferente informashon adishonal duná na BC. Den un sekshon di informashon adishonal, tantu Curoil komo Aqualectra i otro ekspertonan a mustra nan punto di bista na gobièrnu.
Capella ta kere, ku mester tuma vishon kaminda ta bai realmente agresivamente riba tereno internashonal usando Bullenbaai pa evitá e tipo di situashon aki. E ta konsiente ku gobièrnu ta hasiendo su máksimo pa logra Bullenbaai pa Curoil por haña esaki. Na momentu ku Curoil por haña Bullenbaai lo bai gana mas tantu plaka pa e komunidat. “A yega momentu pa realisá na Kòrsou, ku Curoil no ta partidó di gasolin, pero mester kambia e pensamentu aki, ya ku Curoil ta un kompania internashonal”, segun Capella ta revelá na LA PRENSA. “Curoil ta un kompania internashonal ku ta sirbi e komunidat di Kòrsou”.
For di momentu ku Capella a bira direktor di Curoil, el a bin ta reorientá Curoil pa ta un kompania internashonal pa sirbi e komunidat lokal. Capella ta pone énfasis ku a bira tempu pa trata strategianan lòs for di tur aktornan manera PDVSA. Finalmente e ta mustra di ta insistí pa tin Bullenbaai pa abastesé i ku e enfoke usa Curoil komo International Oil Trading na benefisio di e komunidat.