WILLEMSTAD – E siman aki den un oula kompletamente yen di Rijksuniversiteit di Groningen, prof. dr. Ashley Duits a presentá su “oratie”.
Manera tur hende por ta kòrda aña pasá, Professor Duits a wòrdu nombrá komo Profèsòr na Universidat di Groningen i den e kalidat aki algun biaha pa aña e tin ku duna algun “college” na e universidat aki. Esaki ta riba su mes un distinshon masha spesial, ya ku no fásilmente un persona ku no ta residensiá na Ulanda ta haña e oportunidat aki.
E promé “college” ku un Profèsòr ta duna nos ta yama na ulandes “oratie” i esaki ta algu ku ta tuma lugá ku sierto seremonia i na kual famia i amigunan di e Professor ta asistí.
Oula di universidat di Groningen tabata yen yen di famia, amigunan i kolega dòkter di Ashley Duits, hopi ku a bini for di Kòrsou spesialmente pa presensiá e evento sumamente importante di bida di e yu’i di Kòrsou aki, ku na e edat di 45 aña ya por yama su mes Profèsòr na un di e Universidatnan mas respetá di Ulanda. Entre e presentenan tambe tabatin tantu minister Plenipotensiario, sr. Comenensia komo e remplasante di sr. Comenensia, sra. Mavis Brooks-Solomon, kende a duna Ashley Duits lès na skol básiko.
E tema di e “oratie” di Ashley Duits tabata: “Klinisch Onderwijs: Dimensies van een uniek Kwaliteitsproduct”.
Despues di e parti seremonial tur hende por a pasa duna profèsòr Duits pabien den e oula di Universidat pa mas atardi kontinuá ku e selebrashon ku un sena den Martinikerk. Despues di e sena, profèsòr dr. Robert Rojer, kende awendia ta biba na Venezuela i ku a bini spesialmente pa e aktividat di Ashley Duits Ulanda, a interpretá na un manera masha bunita mes diferente número riba piano.
E ambiente tabata unu sumamente agradabel i tambe unu kaminda tur hende presente por a realisá ku apesar ku Kòrsou ta un isla masha chikitu riba mapa mundial, e baranka aki a produsí hendenan ku no solamente ta eminensia riba nan tereno, pero ku ta saka kara di Kòrsou den tur aspekto di palabra.
Profèsòr Duits ta un ehèmpel di un yu’i di Kòrsou, ku apesar di tur ofertanan masha atraktivo ku sigur el a yega di haña for di eksterior a keda kere den Kòrsou i na ningun momentu no a pensa pa bandoná e isla aki. For di Kòrsou e ta sigui kontribuí na bienestar di sensia en general i na mes momentu ta duna su granito na bienestar di nos isla.
Mare tabatin mas hende manera Ashley Duits ku ta dispuesto pa hasi e sakrifisio aki i asina duna nan kontribushon na nos pais.
Den e presentenan nos a mira masha hopi yu’i di Kòrsou di masha renombre, pero ku pa diferente motibu no ta biba aki, pero ta den eksterior. Ta di sigui karga e speransa, ku un dia nos por mira tur e yunan di tera aki tambe na Kòrsou pa asina kontribuí ku e isla ku nan a nase ariba.
Un palabra di felisitashon na Ashley Duits i señora pa e logra grandi aki i nos ta sigur ku den futuro nos lo sigui tende mas di e profeshonal aki ku na e edat hóben di 45 aña ya a alkansá un éksito ku no tur hende por igualá fásilmente.
Riba e pòtrètnan nos por mira momentu ku Ashley Duits ta presentá su “oratie” i tambe un bista di e presentenan i e aktividat despues den Martinikerk. (Esaki ta un kontribushon di Anthony Haile)