WASHINGTON, Merka, - Presidente di Merka George W. Bush ayera a presentá un defensa enérgiko di su prioridatnan na Amérika Latina dor di kalifiká e reformanan di e Gobièrnu nobo di Cuba komo “gestonan bashí” i ora el a pone preshon na fabor di inisiativanan ambisioso pa Mexico i Colombia ku ta konfrontá skrutinio di e demókratanan den Kongreso.
Bush a pronunsiá su promé diskurso amplio riba Amérika Latina fo’i dia ku el a biaha bai e region na mart di aña pasá.
Pa esaki el a skohe e konferensia anual na Washington organisá pa Konseho di Amérika na sede di Departamento di Estado, un grupo prekomersial ku ta promové lasonan estrecho entre Merka i Amérika Latina.
Den un aparente intento di definí su legado riba e region na momentunan ku final di su tèrmino ta aserkando, Bush a defendé su konservadurismo alabando e nesesidat di “hustisia sosial” kompañá ku komersio liber i kondishonamentu di e programanan merikano di asistensia n’e reformanan di merkado liber.
Presidente Bush, persona hopi impopular n’e region, siertamente lo laga su susesor ku un kontinente dividí riba kon lidia ku Washington.
Algun pais, manera Mexico i Colombia, a sera relashonnan estrecho ku Washington, miéntras ku otronan, manera Venezuela i Bolivia, ku forsa ta kritiká e polítikanan merikano.
E palabranan mas fuerte di diskurso di Bush tabata pa Gobièrnu nobo di Raúl Castro na Cuba. I el a ripití su opinion di ku e polítika merikano pa loke ta trata e isla aki no mester kambia, òf Gobièrnu cubano promé mester libra e presunan polítiko i ofresé mas libertat polítiko.
E diskurso tabata esun promé ku Bush a papia den detaye riba desishon di Raúl Castro di aliviá algun restrikshon, manera entre otro pèrmití e cubanonan kumpra telefònnan mobil i keda den hotèlnan, ku promé tabata eksklusivo pa turistanan estranhero.
Bush a abordá e tema cubano un dia despues di papia den un videokonferensia ku lider disidente Martha Beatriz Roque, Bertha Soler, esposa di un aktivista enkarselá, i Jorge Luis García Pérez, kende tabata 17 aña será den prizòn i a keda librá aña pasá.
E tres personanan aki a papia ku Bush fo’i Sekshon di Interesnan di Merka na La Habana.
Bush a kalifiká e kòmbersashon komo “momentu inspiradó”.
“Algun hende na mundu a spera ku kambionan a kuminsá. Ami no ta mir’é di e manera aki. Te ora ku no tin kambio real, di kurason i ku kompashon, i miéntras e Gobièrnu cubano no kambia e forma ku ta trata su pueblo, no tin niun kambio!”, Bush a bisa.
Posteriormente Bush a mishi ku tema di e guera kontra droga, defendiendo inisiativanan di su Gobièrnu pa redusí demanda di narkótiko na Merka komo forma di detené e fluho di sèn prosedente di droga ku ta yega e region.
El a bisa ku e ke sigurá pa Kongreso aprobá un pakete di asistensia antinarkótiko di 1.400 mion dollar pa Mexico i Sentro Amérika, konosí komo e inisiativa di Mérida.
Bush a ekspresá su atmirashon pa Presidente mèksikano Felipe Calderón, kende ta realisando sangriente guera kontra kartelnan di droga mèksikano.
Bush i Calderón a lansa e inisiativa di Mérida komo vehíkulo pa Merka ofresé asistensia militar i di otro tipo na Mexico pa kombatí narkotráfiko, manera helikòpternan pa duna mas mobilidat n’e trupanan mèksikano.
Bush a urgí Kongreso pa aprobá akuerdo di komersio liber ku Colombia, ku segun e demókratanan no por someté na voto awor aki, debí n’e preokupashonnan di derechonan humano i nesesidat di ofresé mas asistensia na trahadónan merikano afektá pa akuerdonan di komersio.
Bush tambe a alabá Presidente colombiano Alvaro Uribe pa redusí violensia na su pais i a haña aplouso fuerte entre esnan presente dor di primintí ku “lo no bira lomba pa un di nos aliadonan mas firme”.

Foto: George W. Bush 0805

Presidente merikano George W. Bush

Foto: Raul Casrtro 0805

Presidente di Cuba, Raúl Castro.