WILLEMSTAD- Fundashon Sedreko a haña e instalashon deportivo den e bario di Dominguito konosí komo “Vèlt di Dok” serka Curaçao Drydock Company Inc. pa manehá. A kuminsá mesora ku e trabounan pa pone e tereno den un kondishon aseptabel pa por práktika deporte atrobe riba dje konsiderando ku e tereno a bai hopi atras e último añanan. A limpia, egalisá i marka e tereno.
Fundashon Sedreko a tuma e desishon di enkargá e organisashon di futbòl di Dominguito ku ta S.V. Centro Dominguito ku e maneho diario dje instalashon.
E desishon aki ta debí ku Fundashon Sedreko a nota hopi seriedat i entusiasmo serka dirigentenan di Centro Dominguito kendenan ta trahando fuerte ku nan tim den divishon máksimo i tambe ku e hóbennan dje bario.
Sr. Udemar, “Shonma” Isidora flamante presidente di e organisashon di futbòl di Dominguito ta realmente hopi kontentu ku e yudansa di Fundashon Sedreko i e desishon pa enkargá Centro Dominguito ku maneho dje instalashon.
Ta e deseo di e presidente di Centro Dominguito ku pronto lo por organisá riba e instalashon aktividatnan deportivo manera ántes.
“Nos ta hopi gradesido na Fundashon Sedreko, i nos lo apresiá otro spònsernan sigur dje bario ku ta dispuesto pa yuda nos pone e instalashon bèk den kondishon optimal”, sr. Isidora ta splika.
E presidente a deklará ku tabatin un kambio formal kaba. E tereno tabata un mondi, pero awor ta hungando futbòl atrobe riba dje.
Tambe ta pendiente pa por yega atrobe na lus riba e vèlt pa por train anochi. I despues tambe traha riba e “kluphuis”, asina sr. Udemar, “Shonma” Isidora a bisa.