WILLEMSTAD - E mesun miembro di parlamentu pa frakshon di MAN Eunice Eisden, kende a pidi un reunion di Komishon Sentral di Staten pa trata e asina yamá “Baseline study” riba kriminalidat, a pidi ayera pa posponé e reunion pa e por prepará mihó. E ke haña kopia ofisial di e rapòrt i tuma nota di e kontestanan ku minister di Hustisia David Dick a duna riba su preguntanan.
“E forma ku minister Dick ta tratando parlamentu – no solamente den e kaso aki – un falta di rèspèt kompleto”, asina Eisden a duna di konosé.
Dia 26 di aprel, Eunice Eisden a manda un karta pa presidente di parlamentu ku tabata kontené un seri di pregunta dirigí na minister David Dick, relashoná ku e rapòrt riba situashon di kriminalidat di nos pais.
Riba e mesun fecha, esta 26 di aprel e parlamentario a manda un di dos karta pa presidente di parlamentu den kua e ta pidi pa tene un reunion di Komishon Sentral den kua minister Dick lo mester bin duna splikashon riba e mesun tema aki. Dia 29 di aprel, presidente di parlamentu a informá miembronan di Staten ku e rapòrt ta na nan disposishon i ku nan por tuma nota di su kontenido den forma konfidensial.
Dia 5 di mei, presidente di parlamentu a manda un karta den kua e ta rekòrdá e minister menshoná riba e preguntanan di parlamentario Eisden, esta ku e ke haña un kontesta promé ku e reunion di Komishon Sentral.
Dia 7 di mei, esta ayera, parlamentario Eisden mes a manda un karta den kua e ta bolbe urgí minister di Hustisia pa kontestá su preguntanan i pa manda informá parlamentu si e rapòrt finalmente ta konfidensial òf no.
Parlamentario Eunice Eisden ayera klaramente tabata hopi desgustá pa aktitut di gobièrnu – den e kaso aki minister di Hustisia – pa e forma indiferente ku el a bin ta trata parlamentu.
“Mi ke pone bon kla, ku ami no ta kere ku esaki ta e forma korekto pa trata un parlamentu. E minister aki ta hisa preguntanan ku parlamentu hasi pone un banda i no ta kontestá nan.
No ta promé biaha ku e kos aki ta sosodé. Resientemente mi a manda pregunta pa e minister relashoná ku e desmantelashon aselerá di Centrale Politiedienst, CPD. Mi no a haña kontesta. E mesun minister aki a primintí nos for di algun luna pasá ku e lo manda tur dokumento relashoná ku e supuesto areglo di ekspulshon di antianonan for di Ulanda. Te awe nos ta sinta warda. Ta p’esei mes mi a saka un karta awe pa rekòrdá e minister riba e kosnan aki. E forma ku e mandatario aki a bin ta trata parlamentu ta demostrá un falta di rèspèt kompleto. E no ta di akuerdo ku prinsipionan di demokrasia parlamentario,” Eunice Eisden a bisa den un krítika fuerte kontra e mandatario.
Durante e reunion ayera tardi, Eisden a lansa e pregunta kategóriko: e rapòrt ta konfidensial si òf no, ta loke e tabata ke sa.
Minister di Hustisia David Dick klaramente no por a kaba di komprondé henter e komishon.
E mandatario a anunsiá ku el a manda e rapòrt aki for di aña pasá pa parlamentu. Loke a pasa ta ku un kolaborador di dje a pone aserka ku e rapòrt ta bou di embargo, pero esei tabata un malkomprondementu. Loke ami no tabata ke ta, pa a pasa pa publikashon komersial di e rapòrt aki, Dick a bisa.
El a bisa, ku for di momentu ku manda un relato parlamentu, e ta un dokumento ku parlamentu por tuma nota di dje libremente.
Parlamentario Eisden sinembargo a insistí ku Staten tabata bou di e impreshon ku e rapòrt tin un karakter konfidensial i ku ta p’esei, a pone solamente “ter inzage” pa miembronan di parlamentu.
El a bisa, ku pa e hecho ku e no a haña kontesta riba e preguntanan ku el a manda, kombiná ku e hecho ku e no por a tuma nota na drechi di kontenido di e rapòrt, el a pidi pa posponé e reunion, ku su mes frakshon por sierto a pidi.
Presidente di parlamentu a proponé den promé instansia pa esaki tuma lugá aki dos siman, ora tin siman di reunion di parlamentu atrobe, pero a resultá ku minister David Dick ta den eksterior.
Esei a pone ku awor e reunion lo bai tuma lugá den kuminsamentu di yüni, ora e mandatario ta bèk na ofisina.