WILLEMSTAD – “E islanan chikitu Boneiru, Saba i Statia a gasta ménos plaka den e promé kuater lunanan di e aña aki, ku tabata originalmente planiá. Pero esaki no ta niun motibu pa húbilo”, asina Hans Weitenberg a deklará durante un enkuentro ku prensa ayera.
Hans Weitenberg ta presidente di College financieel toezicht, e Kolegio di Supervishon. Den e dianan ku a pasa, e kolegio a bishitá e islanan aki pa di dos biaha.
E bishita tabata den kuadro tambe di esfuersonan ku mester kristalisá den futuro pa yega na ehekushon di presupuesto 2008 i preparashon pa yega na un presupuesto 2009.
Segun Hans Weitenberg, e hecho ku e islanan a gasta ménos plaka den e promé kuartal di e aña aki, por parse bon notisia, pero ku en realidat mester wak e asuntu aki masha bon.
Segun Weitenberg, tabatin motibu pakiko e islanan no a gasta mas tantu plaka.
“Ami ta kere ku e islanan tabata asina drùk ku formulashon di presupuesto 2008 ku nan no tabatin tempu pa atendé e parti di ehekushon manera mester ta. Konkretamente esaki ta nifiká, ku tabatin kuentanan ku a keda drumi, ku e islanan no a paga i ku di tur manera, lo mester paga den futuro. Simplemente tabatin ménos tempu pa aktividatnan regular di gobernashon. Nos ta tene kuenta ku e loke a keda drumi, lo mester keda paga tòg den futuro,” Weitenberg a duna di konosé.
Un dje kosnan ku ta preokupá e kolegio, ta e hecho ku kuentanan anual ainda ta un problema den maneho finansiero di e islanan aki.
“Pa loke ta añanan 2006 i 2007, no tin kuenta anual ku ta duna un bista di e situashon i maneho finansiero di e añanan ei.
Pa e motibu ei mes, nos a urgí e islanan pa nan sòru pa den futuro kuentanan anual ta kla na tempu. Originalmente a pone 1 di aprel komo fecha pa esei sosodé, pero e no tabata un fecha alkansabel. Awor aki nos a fiha 1 di yüli pa esei tuma lugá”, Weitenberg a bisa.
El a bisa, ku ya kaba ta papiando di presupuesto 2009 pa esei tambe ta na kla na tempu. Mi ta kere ku ta na su lugá apuntá aki, ku ta na benefisio di e islanan mes pa esei sosodé, el a agregá.
Esaki ta importante tambe pa determiná ken ta bai karga ku e défisitnan korespondiente, segun e presidente di Kolegio pa Supervishon Finansiero a sigui bisa.
Ta un hecho ku Ulanda a indiká klaramente di ke sostené e islanan aki finansieramente, inkluso ku eventual défisit. Pa loke ta e défisitnan di e aña aki i e añanan benidero esei no ta parse un problema. Pa loke ta e dos añanan promé, esta 2006 i 2007 mester wak esaki ainda. “Semper mi tabatin e impreshon sinembargo, ku si ta trata di défisitnan aseptabel, Ulanda lo kubri esakinan”, el a indiká.
Hans Weitenberg a bisa finalmente, ku e no tin miedu ku ekspertonan finansiero ulandes lo “invadí” e islanan den kuadro di nan sosten tékniko.
“E intenshon ta, pa e ekspertonan aki traspasá finalmente nan konosementu na hendenan lokal di e islanan di manera ku nan presensia no ta nesesario mas,” e presidente di Cft a bisa finalmente.