WILLEMSTAD - Presidente di parlamentu antiano Pedro Atacho ta para ‘riba ku mester ta posibel apliká e mesun reglanan di komportashon ku ta konta pa reunion di Tweede Kamer na Ulanda, pa e enkuentro parlamentario tripartite entre Antia, Ulanda i Aruba. Pero Wilibrord van Beek, presidente di e delegashon parlamentario ulandes no kier a bai mas leu, di primintí ku e lo pone e petishon aki na huisio di parlamentu ulandes.
Esei básikamente ta resultado di e reunion di Presidio, ku a tuma lugá den e dianan tras di lomba. Wilibrord van Beek, Pedro Atacho i Mervin Wyatt-Ras, e último aki presidente di parlamentu di Aruba durante un konferensha di prensa ayera a bisa ku e enkuentro di Presidio a bai den un bon esfera relashoná ku e intenshon pa reuní na luna di yüni awor.
Tur tres a ekspresá e deseo pa e reunion di POK, Parlementair Overleg Koninkrijkrelaties sigui otro luna.
Esaki, relashoná ku e virtual kontroversia ku a surgi rondó di e siguiente enkuentro parlamentario aki.
Presidente di parlamentu antiano Pedro Atacho anteriormente a bisa enfátikamente ku Staten lo partisipá na Parlementair Overleg Koninkrijksrelaties (POK) basta establesé adelantá kiko ta e reglanan na kua kada pais partisipante mester tene nan mes na dje. Un dje kosnan ku mester ta bon kla ta, ku presidente di e enkuentro mester por aktua si dado momentu kos sali for di man.
Ulanda sinembargo a rechasá siman pasá e eksigensia di Atacho. Wilibrord van Beek a bisa, ku e no ta sinti nada pa bai establesé regla pa un enkuentro asin’aki.
Manera entretantu ta konosí, e promé POK di e aña aki, ku mester a tuma lugá na febrüari no a sigui. Motibu tabata deklarashonnan deningrante di un miembro di e delegashon parlamentario ulandes Hero Brinkman di Partij voor de Vrijheid (PVV).
Brinkman a bisa na Ulanda, na bispu di e enkuentro, ku Ulanda mester kibra tur relashon ku e islanan di Antia, pasobra ta trata aki di un “nèshi di ladron, un kantidat di hende korupto” i ku e mihó kos ku Ulanda por hasi ta “pone Antia riba Internèt pa bende esaki na findishi”.
Un ekspreshon ku a kai masha malu aki na Antia. Antia a eksigí un diskulpa, pero Brinkman sinembargo a ninga di hasi esaki.
Pedro Atacho, awor ke pa e reglanan ku ta konta pa funshonamentu di parlamentu ulandes, konta tambe durante e enkuentro parlamentario entre e tres partnernan den Reino.
“Mi no ta weta nesesidat pa bin ku reglanan mas estrikto òf regla adishonal, pero si nos ke pa e reglanan ku normalmente ta konta pa Tweede Kamer, konta tambe pa POK,” Atacho a bisa.
Van Beek a primintí, ku e lo pone e petishon aki dilanti parlamentu ulandes. E siguiente POK ta programá pa tuma lugá di 11 pa dia 20 di yüni próksimo.