CRAWFORD, Texas, - E último bia ku yu muhé di un Presidente di Merka aktivo a kasa tabata na yüni 1971.
E tempu ei Presidente merikano Richard Nixon su yu muhé Patricia a kasa i esaki tabata un akontesimentu públiko i polítiko kompletu.
Retransmití bibu i direkto for di Kas Blanku, e kasamentu a konta ku asistensia di 400 invitado i 600 periodista.
Presidente Nixon inkluso tabata preokupá unda mester pone kámaranan di televishon i su yu muhé tabata okupá portada di revista Life.
Djasabra awó, kosnan ta bai ta hopi diferente ora Jenna Bush, di 26 aña, bisa “si, mi ke” riba altar.
Lo no bai tin kámaranan públiko.
E lista di invitado p’e kasamentu di un di e yunan ohochi di George W. Bush i Laura Bush, i e frei Henry Hager ta konsistí di mas o ménos 200 persona, mas ku mitar ta famianan, i e esenario lo bai ta e teranan di Crawford, e rancho kaminda famia Bush sa keda.
Seremonia privá
E famia a disidí, riba deseo di Jenna, pa realisá e kasamentu un kuestion di perfil abou i, prinsipalmente, privá, i Kas Blanku a anunsiá ku solamente lo fasilitá e medionan di komunikashon un pòtrèt di e akontesimentu.
E desishon inisialmente ta faboresé un Presidente ku popularidat mas abou den historia, i lo no bai mir’é ku bon wowo si invertí sèn di e kontribuyentenan den un seremonia demasiado karu den tempu di guera i krísis ekonómiko.
Esun ku a duna mas informashon riba e kasamentu ta Jenna mes den un entrevista publiká den Vogue di luna di mei.
E kasamentu lo tuma lugá djasabra awó mitar di shete di atardi pa evitá kalor di Texas, ounke tin 20% di posibilidat ku áwaseru por kai.
E brùit lo bisti un trahe di organza kreá pa Oscar de la Renta, ku detayenan bòrdá i un kola kòrtiku.
Solamente lo bai tin un dama di honor, su ruman muhé ohochi Barbara.
Lo selebrá e seremonia dilanti un krus realisá ku piedra di kalki ku George W. Bush a regalá su yu muhé i ku lo keda instalá na e rancho.
Jenna, kende den promé añanan di mandato di su tata ku sierto frekuensia tabata den notisia pa motibu ku alkohòl, a alehá su mes for di fokonan miéntras e tabata terminá su estudionan. Despues ku el a gradua, el a biaha bai Latinoamérika ku UNICEF i a skibi un par di buki, esun mas resiente ku su mama, pa fomentá lektura.
Tabata na 2004, durante kampaña pa re-elekshon di su tata, el a konosé Henry Hager, yu hòmber di Presidente di Partido Republikano na Virginia, kende ta bai kumpli 30 aña.
I ounke inisialmente Laura Bush a ninga e noviazgo, rumornan a kuminsá plama ora e pareha a kuminsá aparesé den aktonan públiko.
A anunsiá a kompromiso 15 di ougùstùs último.
Europa por bira destino di nan “honeymoon”.
Despues nan lo biba den un kas ku dos kamber situá na sùit di Baltimore ku nan a kumpra pa 285.000 euro.

Foto; Jenna Bush i Henry Hager 0805

Un kòmpiuter “mouse pad” ku pòtrèt di Jenna Bush i Henry Hager ta un di e artíkulonan konmemorativo na benta na un negoshi di souvenir na Crawford, Texas.