WILLEMSTAD – “Aliansa Patriótiko ta kontemplando ki akshon por tuma, i lo reuní den fin di siman despues di a tuma nota ku gobièrnu a anunsiá oumento di preis di diesel i gasolin”, asina Nelson Navarro a duna di konosé. A tuma nota ku ya algun sindikato ta prepará pa un akshon i a bisa kaba ku e oumentonan anunsiá ta inaseptabel. Navarro a bisa di ta konsiente ku den henter mundu petrolero a subi i su influensia, algu ku nos no tin den nos man. “Mester chek e preisnan energétiko, kaminda lokalmente por atendé di manera ku no ta afektá konsumidónan di mas, algu ku nos mester hasi.” Komo Aliansa Patriótiko ta bai mira kiko por hasi pa aliviá e asuntu i ta bai mira ki por hasi pa atendé e punto aki.
E proposishon ku Gobièrnu di Kòrsou kier aserká Gobièrnu Sentral kuné pa redusí akseins riba produktonan derivá di petroli i komestibel di promé nesesidat, ta un proposishon ku Forsa Kòrsou a yega di hasi den pasado. Mester por baha e akseins riba e produktonan menshoná, pero mester kompensá e falta di entrada pa por kubri otro kaminda pa no krea un otro défisit ku lo tin influensia riba presupuesto di Gobièrnu Sentral. Tur eseinan ta kosnan ku mester sosodé. Forsa Kòrsou ta pro e proposishon asina i lo sostené sigur den Parlamento.
E komishon di energia a bini ku diferente proposishon. Un punto ku sin mas mester atendé ta energia alternativa, mester atendé mas rápido posibel kuné. Nos tin tur e elementonan pa hasi uso di esei. Solo, laman, i bientu ku mundialmente konosí komo fuente di energia alternativa. “Ya ta pa añanan ta papiando riba esakinan. Mester buska manera pa hasi uso di esaki i duna un alivio. Gobièrnu mester hasi muchu mas den e direkshon aki,” asina Navarro a konkluí. Por sierto ku e grupo sindikal den komishon di energia a haña bastante krítika for di ayera tardi ku a anunsiá e oumentonan, prinsipalmente e manera ku e representante a defendé su posishon. Tabatin gritunan pa trahadónan no solamente mobilisá individualmente, pero tambe pa kita nan miembresia for di sindikalismo, ya ku nan no a sirbi e kousa. Tabatin problema ku e posishon di sindikato for di kuminsamentu ora a forma e komishon i hasta t’asina ku tabatin sindikato ku a distansiá for di e komishon i a mustra nan malkontentu abiertamente.