BEIRUT, Lebanon, - Konfrontashonnan fuerte a sakudí Beirut despues ku grupo Hezbollah, apoyá pa Iran, a bisa ku Gobièrnu libanes respaldá pa Merka a deklará guera ora a trata desmantelá su ret di telekomunikashon militar.
Fuentenan di seguridat a bisa ku 11 persona a muri i otro 30 a resultá heridá den e kombatenan.
Durante ayera nochi por a skucha sonido di eksploshonnan di granatnan i tirunan di armanan outomátiko di e pió konfrontashonnan interno for di tempu di e guera sivil di 1975 pa 1990.
E lider di koalishon gobernante, Saad al Hariri, a proponé un akuerdo pa terminá e krísis, bou di kua e desishon di e Gobièrnu ku a pone Hezbollah bira furioso, lo bai keda konsiderá komo “un mal entendimentu”.
Despues lo manda e desishonnan pa Ehérsito libanes, ku a keda neutral den e kombatenan, loke lo duna e komandante di forsanan armá, general Michel Suleiman, e opshon di suspendé su implementashon.
Pero e kanal di televishon al-Manar di Hezbollah posteriormente a sita un fuente di oposishon kende a rechasá kualke idea pa pone fin n’e konflikto, òf mester ta proposishon di lider di e grupo, Sayed Hasan Nasralah, ku a keda presentá ayera.
Nasralah a eksigí ku e medidanan ku e Gobièrnu a adoptá e siman aki, mester anulá nan.
Konseho di Seguridat di Nashonnan Uní a pidi “kalma i moderashon”, urgiendo tur parti pa regresá na diálogo pasífiko.
Kas Blanku a urgí Hezbollah terminá ku su aktonan “negativo”.
Milisianonan di e movementunan chiita Hezbollah i Amal a interkambiá tirunan di fusilnan i lansagranatnan na vários zona di e kapital ku hòmbernan armá di Gobièrnu, entre nan algun leal di e movementu suni ‘Future’.
Fuentenan di seguridat a bisa ku hòmbernan armá di Hezbollah a tuma kòntròl di sinku ofisina di grupo Future di Hariri i kasnan di funshonarionan pro gubernamental vigilá pa polisnan.
A sende hopi vehíkulo i negoshinan na kandela, i hopi sivil terorisá a huí for di zonanan konfliktivo.
Hezbollah a lansa un kampaña nobo di protestanan riba kaya djarason último, oumentando preshon riba e Gobièrnu, despues ku Gobièrnu a deklará e ret di komunikashon di Hezbollah komo ilegal i a retirá Hefe di Seguridat di e aeropuerto, un figura serkano n’e grupo.
Partidarionan di e grupo i su aliadonan a blòkia kareteranan ku ta bai n’e aeropuerto, e úniko vínkulo di Lebanon ku mundu eksterior, i otro kayanan prinsipal, paralisando gran parti di e kapital.
E aeropuerto apénas tabata funshoná, i solamente algun buelo tabata aterisá i lanta, funshonarionan a bisa.

Foto: Hezbollah simpatisante 0905

Un simpatisante di Hezbollah ta kima tirenan riba “highway” pa bai Lebanon International Airport durante e protesta na Beirut.

Foto: Lebanon homber 0905

Un hòmber ta kana pasa banda di ruinanan poné pa siguidónan di Hezbollah ku a blòkia e “highway” pa bai Lebanon International Airport.

Foto: Lebanon pasaheronan 0905

Pasaheronan ta sinta warda na Lebanon International Airport, despues ku kompanianan a kanselá tur buelo ora simpatisantenan di Hezbollah a blòkia kareteranan ku ta bai Lebanon International Airport.