CARACAS, Venezuela, - Den presentashon di resultadonan di promé reunion ministerial di Konseho Energétiko di Nashonnan Suramerikano di Kumbre di Unasur, for di salon Joaquín Crespo di Palasio di Miraflores, Presidente di Venezuela Hugo Chávez a atvertí ku “Venezuela no ta bai keda ku brasanan krusá” den kaso si presentá agreshonnan na Bolivia.
Chávez a referí na e statutonan outonómiko na Bolivia, i a responsabilisá Merka di esakinan.
“E plan kontra Bolivia ta faktura merikano”, e lider venezolano a sigurá.
“Akusá mi di inherensia. Mi ta deklará mi mes kulpabel for di awor aki mes!”, Chávez a deklará.
E promé mandatario venezolano a pronostiká ku si ataká e region, lo por kuminsá “un Vietnam, dos Vietnam, òf tres Vietnam na Amérika Latina!”
El a sigurá ku e referèndem organisá djadumingu último na e region boliviano di Santa Cruz ta “un plan kontra Suramérika” ku ta pasa pa Ecuador i Venezuela, kaminda, segun Chávez, lo eksistí tambe intentonan separatista similar.
Relashoná ku e supuesto plan seseshonista na Zulia, e lider venezolano a bisa: “Ya a presentá un plan di seseshon na estado di Zulia, e gobernador di einan, algun diputado, i konseho legislativo di einan. Buska un Ehérsito i ranka kita, si boso por, un pida di nos patria. Boso no ta bai logra!”
E promé mandatario a kalifiká komo un “Guera di Seseshon nobo” e akshonnan ku promotornan di outonomia di Zulia lo tin ku realisá pa logra nan ophetivo.
E representashon di Gobièrnu venezolano a ratifiká su kompromiso ku integrashon latinoamerikano, i Minister di Poder Popular pa Energia i Petroli, Rafael Ramírez, a deklará riba e avansenan den materia energétiko na e region.
E enkuentro ministerial, realisá ayera na siudat di Caracas, a trata riba e tratado di seguridat energétiko di e region ku lo keda konsiderá den e reunion ku Presidentenan di Union di Nashonnan Suramerikano (Unasur) ku lo bai tuma lugá na Brazil 23 di mei benidero.
Representantenan di diesdos pais a partisipá den e hornada.
Entre nan, Ministernan di Planifikashon i Ekonomia i di Argentina, Julio de Vido i Carlos Fernández, respektivamente.
Tambe a asistí representantenan di Gobièrnunan di Brazil, Bolivia, Colombia, Chile, Ecuador, Sürnam, Peru, Paraguay i Guyana.

Foto: Hugo Chavez 0905

Presidente di Venezuela, Hugo Chávez.