WILLEMSTAD – Plataforma Sindikal, ta kontra dje medidanan ku gobièrnu a anunsiá ayera, relashoná ku e oumento di kosto di bida. Sidney Justiana, kende na nòmber di Plataforma Sindikal, ta representá den e Komishon Miksto di Energia, tabata esun ku a hasi e deklarashon aki.
“Nos a forma parti di e komishon i mi mester bisa, ku e komishon a hasi su trabou na un forma magnífiko. E meta tabata pa suavisá e sla ku e oumentonan aki ta trese kuné,’’ Justiana a bisa. Sinembargo segun e lider sindikal, finalmente ta Bestuurscollege ta esun ku ta tuma e desishon. “Nos por a skohe, pa keda den e komishon òf pa legumai partisipashon na e proseso”, Sidney Justiana, a indiká. “Pero sindikalismo ta opiná ku a kuminsá un kos huntu i mester kamin’é konhuntamente”.
Posishon sindikal
E posishon sindikal ta enserá, ku e komishon a hasi un trabou kaminda ku e sindikatonan a purba, mirando e realidat ku tin un desaroyo internashonal, ku no por kontrolá, pa krea un situashon unda por aliviá esnan den nos komunidat ku tin mas nesesidat.
“Ta p’esei nos a disidí di keda den e Komishon Miksto di Energia. Pasobra bo tin mester di un òf otro forma krea e kolchon aki’.
Bicho Justiana a bisa di ta fèrwagt ku lo akusá Plataforma Sindikal di no a hasi sufisiente esfuerso. “Pero den bida ora hasi un eskoho mester karga kuné i hecho ta ku gobièrnunan di turno, durante último seis añanan, no a tende e pensamentu sindikal.”
Justiana: “Nos a bisa e diputadonan ku nos ta kere ku e pakete ku ta na kaminda, mester ta un sosial, unda ku entre otro mester supsidiá transporte pa esnan ku ta den nesesidat. Tambe e pakete sosial, mester enserá ku tin kòntròl riba spekulashon di preisnan di komersiantenan di mala fe. Den kaso ku no tin un vishon kla, kon ta desaroyá e komunidat aki, por surgi un situashon unda ku ta surgi sierto desòrdu sosial.”
Reunion
Komo sindikato djamars awor, Plataforma Sindikal lo reuní pa splika e miembronan, kiko ta e liña di pensamentu di e organisashon. Sektor sindikal, nunka no a pretendé ku mester tin un situashon mágiko pa stòp e oumento di kombustibel. “Nos sa, ku tin un realidat i ku tin un desaroyo mundial ku mester tene kuenta kuné. Nos ta konvensí ku mester tin e maneho di flankeá ku tur hende ta papia riba dje, pasobra sin dje, por surgi un situashon unda ku ta surgi disturbionan innesesario’, Justiana a enfatisá.