WILLEMSTAD - Apesar ku sindikalismo no ta di akuerdo ku medidanan ku gobièrnu a tuma, relashoná ku e oumento internashonal di preis di kombustibel, e no ta retirá for di e Komishon tri-Partite.
Sidney Justiana, representante di Kámara Sindikal den e Komishon Tri-Partite, a splika, ku e desaroyo i tambe e manera ku nos ta desaroyá den e komunidat, lo pone ku na dado momento nos ta bai pega. Di tur manera sindikalismo, lo mantené su liña di pensamentu. ‘Den e komishon, tantu VBC, Kámara di Komersio, Sindikalismo i tambe sobrá miembronan di e Komishon, a traha bon balansá. No tabatin diskushonnan fundamental. Hecho ta, ku e komishon a hasi su trabou i gobièrnu a keda ku e outoridat pa tuma e desishon’.
Sindikalismo lo keda forma parti di e Komishon Tri-partite di Energia, Sidney Justiana, a splika ku esaki ta nesesario, pa sindikalismo perkurá pa e asina yamá ‘kolchon sosial’, pa komunidat. Esaki ta enserá ku for di supsidio pa transporte públiko, supsidio pa shofùrnan ku ta transportá muchanan di skol i kaminda ta nesesario instituí kòntròl pa evitá spekulashon.
Hotline
Kámara Sindikal en todo kaso ta sostené e intenshon pa lanta un asina yamá Hot-Line. Sidney Justiana, a indiká ku mester determiná ainda si e hot-line lo ta na SSK òf na un otro sede sindikal. Meta dje hot-line ta, pa hendenan por duna informashon di komersiantenan di mala fe ku ta spekulá ku preis. Ta posibel pa hendenan por yama riba e number aki a duna e informashon. Na su turno, sindikalismo lo perkurá pa pasa e informashon na e komersiantenan pa krea e balansa nesesario.
Justiana a ripití, ku e no ta di akuerdo ku e medidanan, pero ku riba e pregunta, kiko otro e mester tabata, lo ta un tópiko riba kua por diskutí masha hopi riba dje.
Por spera sinembargo, ku relashoná ku kiko mester hasi pa suavisá e doló di e oumento di kosto di bida, por fèrwagt ku sindikalismo lo fungi komo un ‘watch-dog’.
‘Mi tin sigur, ku lo tin hopi eksperto ku lo mustra bo kiko nos a hasi robes. Loke ku nos den e mundu sindikal ta bisa ta, ku en todo kaso nos ta sigui, pasobra ku ta den e tomo di desishon aki bo por influensiá. Nos lo purba influensiá tantu ku ta posibel pa e klase trahadó. ‘I pa e klase marginá por tin un kolchon sosial ku kua e por wòrdu yudá’.