WILLEMSTAD - Tal manera LA PRENSA a antisipá kaba den su edishon di ayera, dia 15 di desèmber den futuro lo bira Dia di Reino. Lo ta un dia liber i un dia di fiesta. Dia 15 di desèmber – ku den pasado tabata ser selebrá kaba komo Dia di Statüt, un dia di fiesta – awor lo remplasá Dia di Antia, ku nos a bin ta selebrá tur aña dia 21 di òktober.
Parlamentu di Antia a bai di akuerdo ku e proposishon di lei aki, pero mester bisa ku tabatin hopi diskushon rondó di e intenshon.
Miéntras ku frakshon di Frente Obrero, pa medio di su lider di frakshon, Mirna Louisa-Godett sin mas a anunsiá di ta sostené e proyekto di lei aki, tabatin otronan ku tabata mas krítiko.
Jacqueline Spencer (PAR) a aploudí e lei. El a rekòrdá ku algun aña pasá, tur isla di Antia, pa medio di un referèndem demokrátiko a papia palabra kla. E islanan no tabata ke keda mas den Antia, pero si a vota na fabor pa keda den Reino. PAR, komo tal ta aploudí e lei, pero tòg tin un preokupashon, el a bisa.
Nos mester evitá ku e lei aki ta bira un lei, kaminda ta simplemente dekretá un dia di fiesta, ku ta bira un dia liber komun i koriente.
El a bisa, ku mester hasi tur loke ta posibel pa duna e dia kontenido real pa asina evitá ku e dia mes lo bira un simpel dia liber.
“Dia a instituí Dia di Antia, a hasi esaki ku sierto meta. E dekreto ta bisa ku mester stimulá mas tantu posibel e sintimentu di solidaridat entre pueblonan.
En bèrdat nos a selebrá e promé aña den forma grandi, pero despues no tabatin nada pa hasi e dia, un dia di importansia. Nos no a logra nos meta, anto nos frakshon no ke pa istoria ripití. E no mester bira djis un dia sin kontenido,” Spencer a apuntá.
Ray Hassell, representando WIPM den parlamentu antiano tambe a aploudí e lei. Nos ta bibando den un mundu kaminda hende ta tratando di uni. Nos ta biba den un mundu di globalisashon. Den e referèndem algun aña pasá islanan a vota klaramente pa keda den Reino, sea den forma di un pais outónomo, sea den forma di entidat spesial den konstelashon di Reino.
Esei ta trese un kompromiso kuné: nos mester siña biba ku otro, Hassell a indiká.
Glenn Sulvaran lider di frakshon di PAR ta kere ku mester kuminsá wak e kosnan positivo. “Mi ta haña ku nos ta muchu bezig ku kosnan negativo, tratando semper di splika di kon un kos no mester tuma lugá. Nos mester kuminsá pensa den konteksto di konstrukshon, pasobra ta dje forma ei nos ta bai dilanti”, el a bisa.
Mester bisa ku tabatin en general sosten pa e proposishon di lei.
Finalmente a vota riba e proposishon di lei: un mayoria di 13 miembro a vota na fabor, miéntras ku 4 a vota kontra.