WILLEMSTAD – “En bes di dediká atenshon na desmantelashon di Antia, na realisashon di deseo di pueblo pa un pais outónomo den Reino, un Gobièrnu Sentral ta bai laga su ekspertonan dediká nan tempu ku un lei pa regla un dia ku ta un dia di fiesta”, asina Eunice Eisden di frakshon di MAN den parlamentu a deklará. E pensamentu aki di e parlamentario, defakto a reflehá pensamentu di otro manera un partido Forsa Kòrsou, ku tambe a bisa ku no tin nada di bai selebrá.
Parlamentu – manera LA PRENSA ta relatá den Un otro artíkulo – finalmente a bai di akuerdo ku e proposishon di lei pa instituí Dia di Reino dia 15 di desèmber. Pero partidonan di oposishon klaramente tin otro pensamentu.
Segun Eunice Eisden no tin nada di selebrá. “Tanten ku nos no rekonosé e pasado, e pasado manchá pa kontrabanda di hende i hòrtamentu di pais, no tin nada pa selebrá”, el a bisa.
El a para ketu ekstensamente na último desaroyonan kaminda Ulanda ta menasando ku un areglo di ekspulshon, kaminda Ulanda ke introdusí un registrashon pa spesífikamente antianonan, e asina yamá VIA i kaminda no tin rèspèt ètòl pa Antia.
Aparentemente nos tin un gobièrnu ku ta preferá di traha riba “kosnan leuk”, na lugá di atendé kosnan mas serio promé.
Segun Eisden, ta inaseptabel ku ta papia di selebrashon di Dia di Reino, anto no ta atendé ku deseo di pueblo pa haña su outonomia den Reino.
“Ta ken a bisa mes, ku pueblo di Kòrsou ta interesá pa selebrá Dia di Reino? Ken a bisa ku nan tin gana? Pero no, nos ta bòltu e kos. Selebrashon promé, despues ta wak outonomia, un outonomia ku kasi no a sobra nada mas di dje,” segun Eunice Eisden.
Nelson Navarro a splika ku for di dia ku a kuminsá trata e asuntu aki den reunion di Komishon Sentral, frakshon di Forsa Kòrsou a apstené di duna komentario. Esei a sosodé deliberadamente.
“Simplemente nos no ta weta nada, pero apsolutamente nada di selebrá den Reino. Si nos weta kon kos ta andando den Reino, si nos weta kon e partner mas grandi den Reino ta tratando nos, si tuma nota di e sonidonan negativo ku ta saliendo, mi ta duda ku esaki tabata e Reino ku nos tur tabata ke. Nos ta papiando di un défisit demokrátiko ku nos tin añanan largu ta buskando un solushon p’e, pero te awe nos no a logra esei. A yega e momentu pa nos reflehá riba e kosnan aki,” Navarro a trese dilanti.
El a bisa, ku dia a lanta Forsa Kòrsou, e partido a ekspresá klaramente e sintimentu a keda den Reino, E partido asta a formulá un vishon kon e ta weta e asuntu aki funshoná den práktika. E forma ku nos a mira esaki ta un Reino ku amor i rèspèt pa otro, un Reino ku lo tabatin balor agregá pa tur partner. “Tur hende mester a bira un miembro orguyoso di ta forma parti di Reino. Pero esei sigur no ta e kaso awor aki”, el a enfatisá.
Navarro a puntra su mes finalmente ku mirando e hecho ku nos ta meimei di desmantelashon di Antia, si lo no tabata mihó laga kada isla disidí pa su mes kiko e ta bai hasi riba e tereno aki. “Mi ke sa ademas si e sintimentu di selebrashon di Reino ta biba na Ulanda”, e lider di Forsa Korsou a agregá.
Tantu frakshon di Forsa Kòrsou i di partido MAN finalmente a vota kontra di e proyekto di lei.