SCHIPHOL/ WILLEMSTAD - Un situashon berdaderamente ferfelu ta reina for di awe mainta na aeropuerto internashonal Schiphol na Ulanda, komo konsekuensia di un wèlga di parti di e personal. Ta trata aki di personal di Menzies, e kompania ku ta enkargá ku despacho di maleta.
E trahadónan aki a disidí di pone trabou abou, pasobra negosiashon pa un kontrakt kolektivo nobo a pega formalmente i no tin indikashon kon ta bai sigui.
Personal ta eksigí un oumento di salario di 3.5 porshento, pero e kompania Menzies no ke duna mas ku 1.5 porshento. Korte a disidí ayera na Utrecht ku trahadónan ku ke drenta akshon, tin derechi di hasi uso di nan derechi di wèlga den e kaso aki.
Korte a bisa ku e ta konsiente ku e akshon lo nifiká molèster na e aeropuerto en kuestion, pero ku e molèster lo no ta di tal índole ku e ta inaseptabel, manera gerensia di e kompania a bin ta insistí.
Mester bisa di otro banda, ku no ta henter e kompania ta den wèlga. Solamente un parti di e trahadónan a disidí di pone trabou abou. Rene Windhouwer, hefe di Asuntu di Personal na Menzies a bisa, ku esnan ku si ta traha, ta funshonando bon i ku tin bon ambiente di trabou.
Schiphol ta ferwagt di atendé ku 145 mil pasahero awe, ku un portabos a kalifiká komo “un dia hopi drùk”.
Gerensia di aeropuerto mes a bisa, ku e no ta kere ta nesesario te ainda, pa tuma medida adishonal.
Menzies tin pa awe un total di 17 buelo ku e mester despachá.
Menzies ta responsabel pa mas o ménos 10 porshento di despacho di maleta na aeropuerto Schiphol. E kompania ta despachá maleta pa en total 16 kompania di aviashon, entre kua e kompanianan Arkefly, Surinam Airways (SLM), Singapore Airlines i EasyJet.
Un dje konsekuensianan ku e wèlga aki tin ta pa e kompania Arkefly, ku manera ta konosí, ta mantené konekshon aéreo entre Ulanda i Kòrsou.
“Den kada buelo, no ta sigur ku por kaba di atendé ku e asuntu di maleta na tempu”, asina Steven van der Heijden, direktor di TUI, bou di kua Arkefly ta kai, a duna di konosé.
Ya kaba tin un buelo pa Aruba i Kòrsou ku a sufri retraso di tres ora.
Arkefly entretantu a pone èkstra personal disponibel pa tantu informá komo sostené pasaheronan durante e momentunan ferfelu aki.
No ta posibel pa pone personal di e kompania pa atendé ku e despacho di maleta, pasobra esnan ku ta traha den e sekshon aki mester tin e papelnan nesesario.
E fin di siman aki ta ferfelu, pasobra tin hopi hende ku ta regresá Ulanda di nan fakansi. Nan ta para na un aeropuerto internashonal ta warda i no sa, ki ora nan buelo finalmente lo bai ta.
Pasaheronan por lo general ta mustra komprenshon pa e situashon, pero ta teme sinembargo ku nan maleta lo pèrdè.