WILLEMSTAD - Forsa Kòrsou ta sumamente preokupá ku e situashon energétiko riba nos isla aki. Segun deklarashonnan ku Nelson Navarro, lider di Forsa Kòrsou a hasi, el a remarká, ku na vários okashon su partido a manda diferente proposishon pa gobièrnu kon pa atendé ku e krísis energétiko. Pero, segun Navarro, su partido no ta haña ningun reakshon di gobièrnu, i ta konstatá ku komishonnan ta wòrdu instituí i ku nan ta rekomendá asuntunan ku den pasado a wòrdu menshoná kaba i ku porfin ta wòrdu implementá. “No tin urgensia di parti di e gobièrnu aki pa atendé e situashon aki. Pa basta tempu kaba nos a antisipá e krísis energétiko aki. Pero no a tuma medidanan ku mester a wòrdu tumá ni tampoko sugerensianan ku a bin dilanti, no a tené kuenta kuné.” Komo ehèmpel, Navarro a menshoná e hecho, ku pa basta tempu kaba, Forsa Kòrsou a proponé un plan pa na Kòrsou hasi uso di energia alternativa. Esaki pasobra nos ta disponé di bientu, solo, laman na Kòrsou, ku ta tur e elementonan nesesario pa na un manera adekuá, atendé ku e krísis aki. “Pero nos a ripará ku no tin oido pa e sugerensianan aki”.
Segun Navarro, awor ku e plan a wòrdu anunsiá, unda ku gasolin i tambe awa i koriente lo bira ímpagabel, pa e pueblo aki, rápidamente mester implementá algu pa aliviá e pueblo.
Preokupashon
Nelson Navarro a referí tambe na e preokupashon ku tin den nos komunidat i ku lo sigui bira mas grandi. E lider di Forsa Kòrsou a menshoná e kantidat grandi di yamada ku el a risibí di hendenan hopi preokupá ku e situashon aki. “Tur hende ta konvensí ku rápidamente mester bin un alivio.”
Entre otro Forsa Kòrsou a sugerí pa laga Gobièrnu Sentral atendé ku e asuntu di Omzet Belasting i tambe accijns. E pueblo di e forma ei mester haña un luf, subi accijns riba parti di alkohòl i sigaria, di manera ku en todo kaso, Gobièrnu Sentral ta wòrdu kompensá pa e pèrdida ku e ta hiba, pasobra ta trata aki produktonan di luho.