WILLEMSTAD – “A yega momentu pa kasinonan na Kòrsou kuminsá kumpli ku lei. No ta bai tolerá mas ku gobièrnu no tin influensia riba e mundu di kasino aki. Tur kasino a haña un periodo di mas o ménos 2 luna – e ta varia di kasino pa kasino – pa regla nan lisensia definitivo di operashon”, asina Reynold Nivillac, direktor di Gaming Control Board a enfatisá.
Pa basta tempu kaba gobièrnu, pa medio di Gaming Control Board (GCB) ta tratando di establesé un situashon di legalidat kompleto den e mundu di hungamentu di plaka.
Mester bisa, ku ta ku e meta ei por sierto, a lanta tambe GCB algun aña pasá, un entidat ku mester sòru pa tur esnan ku ta dediká nan mes na wega di hazar manera ta yam’é, kumpli tambe ku reglanan stipulá pa esei.
Pa un periodo basta largu kaba kasinonan ta operando a base di un lisensia temporal i GCB a indiká den pasado ku e situashon aki no por kontinuá pa tempu largu mas.
“A yega momentu ku mester regla e situashon aki anto e momentu ei a yega awor”, segun Nivillac. Tur kasino a haña un karta den kua ta informá nan ku nan tin solamente un periodo definí pa kaba di regla nan pèrmit di operashon definitivo.
Tin asta un kasino ku a haña dos siman di tempu pa hasi esaki. Ta trata aki di un kasino – Nivillac no kier a menshoná nòmber – ku no a hasi niun intento nunka pa pidi pèrmit.
A laga doño di e pèrmit aki komprondé, ku si e no kumpli, ta laga sera e kasino den forma inmediato. Nivillac a atmití ku el a nota ku entretantu tin trámitenan a kuminsá tuma lugá di parti di e kasino ei, pa e haña su pèrmit.
“Nos ta serio den e kaso aki. Nos tabatin kontakto kaba ku Ministerio Públiko, si mester yega asina leu ku mester aktua ku man fuerte,” asina Nivillac a agregá.
E direktor di Gaming Control Board a bisa finalmente ku esaki ta e promé paso pa yega na sistema di kòntròl den kasinonan. A kuminsá ku e parti di pèrmit, pero e no ta keda te ei, el a sigurá.
E intenshon ta pa unabes ku e parti aki ta tras di lomba, Gaming Control Board kuminsá ku su trabou mes, esta di kontrolá e operashon diario di kasinonan riba nos isla. Pasobra final di kuenta, ta esei ta e trabou mes ku nos mester hasi, el a añadí.
Los for di e trámitenan pa establesé un situashon di legalidat den kasinonan, gobièrnu di Kòrsou ta kontemplando e pensamentu pa basta dia kaba pa kasinonan tambe kuminsá paga impuesto di benta, e asina yamá OB.
Te ku awor kasinonan a protestá enérgikamente kontra e intenshon aki, pero diputado di Finansa Mike Willem, resientemente a mustra ku a yega momentu awor pa atendé e asuntu aki na serio.