WILLEMSTAD – “E gobièrnu ku tin awor aki pa Kòrsou, no ta funshoná. Kòrsou mester di un gobièrnu ku ta goberná. No un gobièrnu ku ta djis atministrá”, asina lider di MAN Charles Cooper a reakshoná riba e anunsio di gobièrnu ku ta bai oumentá preis di produktonan petrolero.
Cooper tabata referí aki na e anunsio ku entrante djaluna awor 12 di mei, preis di gasolin lo subi ku 20 sèn pa liter. Esei ta e promé oumento. Gasolin dia 1 di yüni lo bolbe oumentá ku 20 sèn, pa yega na total 40 sèn pa liter. Preis di disel, lo subi djaluna awor ku 20 sèn, e lo subi dia 1 di yüni ku 20 sèn mas pa finalmente 1 di yüli lo subi atrobe ku 30 sèn.
“E meta ta, pa pone preis di energia na nivel di preis di merkado”, asina diputado Davelaar a splika.
Direktor di Aqualectra Anthon Casperson a anunsiá ku preis di awa i koriente tambe lo subi entrante 26 di mei benidero.
T’asina ku for di febrüari, e kompania a hasi un petishon na Bestuurscollege a adaptá preis di awa i koriente.
E petishon riba mesa ta pa oumentá tarifa di koriente ku 19 porshento, miéntras ku awa lo subi ku 8 porshento.
Pa Charles Cooper, esaki ta muestra ku Kòrsou tin un gobièrnu ku no sa kiko ta nifiká goberná.
“Loke gobièrnu di Kòrsou a hasi ta simplemente pasa e oumento di preis di krudo over pa pueblo, laga pueblo paga. Aparentemente no a pensa ku por tin mas alternativa ku esei ku ta nifiká mesora un alivio pa pueblo,” Cooper a bisa.
Ku gobièrnu no tin influensia riba preis di krudo, no ta un kos nobo. “Nos tur sa preis di petroli a bin ta subi den forma spantoso último añanan. Pero tur pais na mundu tin un gobièrnu ku ta analisá esaki i weta den ki forma e por aliviá su komunidat. Loke nos ke weta ta ki maneho gobièrnu ta bai desplegá den e asuntu aki,”segun e lider di MAN.
“Nos a tende kuestion ku ke traha un tipo di kolchon pa fangu esnan di ménos rekurso i ku ta bin ku maneho sosial.
Pero tur loke e gobièrnu aki a bin ta hasi ta, primintí ku ta bai hasi esaki i primintí ku ta bai hasi esaya. No tabatin nada konkreto ku ta nifiká realmente un alivio”, Cooper a agregá.
Charles Cooper a ripití posishon di MAN den esaki, esta ku solushon pa e krísis energétiko den nos pais por ser solushoná, bendiendo Refineria Isla. “Nos a presentá esaki, pero ta parse ku no ta tumando esaki na serio. Nos si ta kere ku e ta un opshon viabel”, segun e lider di MAN.
“Ademas, tin un faktor ku ainda no a bin asina fuerte dilanti, anto esei ta e hecho ku e impakto di e oumento aki lo ta devastador pa nos ekonomia”, segun Cooper.
“Pa partido MAN, e kaso ta masha kla. Pueblo no mester aseptá e kos aki. Partido MAN en todo kaso lo bai mustra den forma kla, ku e no ta aseptá esaki”, el a agregá.
Ün gobièrnu ku no sa kon goberná, no tin nada ta buska na kabes di un pais. Un gobièrnu asin’aki mester bai kas,” Charles Cooper a afirmá.