WILLEMSTAD – “Lo ta bon pa Ulanda yega na palabrashon riba término kòrtiku ku e islanan di Antia kon e tin pensa di kaba di atendé e asuntu di debe”.
Esei ta konvikshon di presidente di College financieel toezicht (Cft) Hans Weitenberg despues di a bishitá e islanan antiano.
Kolegio pa Supervishon Finansiero a ser instituí aña pasá pa supervisá situashon finansiero di e islanan chikitu, e asina yamá islanan BES ku ta Boneiru, Saba i Statia.
E islanan ke bira un munisipio spesial di Ulanda i nan a yega na e palabrashon ku dentro di 3 aña nan presupuesto lo ta kompletamente balansá.
Weitenberg a bisa, ku e proseso ei ta kanando na satisfakshon, “pero tin hopi kos pa hasi ainda,” segun el a añadí mesora.
Den e dianan ku a pasa, e kolegio a bishitá e islanan aki pa di dos biaha. E bishita tabata den kuadro tambe di esfuersonan ku mester kristalisá den futuro pa yega na ehekushon di presupuesto 2008 i preparashon pa yega na un presupuesto 2009.
Segun Hans Weitenberg, Kolegio di Supervishon Finansiero a konstatá, ku e islanan a gasta ménos plaka den e promé kuartal di e aña aki. Segun Weitenberg sinembargo, ounke ku e por parse un desaroyo positivo, tabatin motibu pakiko e islanan no a gasta mas tantu plaka.
“Ami ta kere ku e islanan tabata asina drùk ku formulashon di presupuesto 2008 ku nan no tabatin tempu pa atendé e parti di ehekushon manera mester ta. Konkretamente esaki ta nifiká, ku tabatin kuentanan ku a keda drumi, ku e islanan no a paga i ku di tur manera, lo mester paga den futuro. Simplemente tabatin ménos tempu pa aktividatnan regular di gobernashon. Nos ta tene kuenta ku e loke a keda drumi, lo mester keda pagá tòg den futuro,” Weitenberg a duna di konosé.
Un dje kosnan ku ta preokupá a kolegio, ta e hecho ku kuentanan anual ainda ta un problema den maneho finansiero di e islanan aki.
Pa loke ta añanan 2006 i 2007, no tin kuenta anual ku ta duna un bista di e situashon i maneho finansiero di e añanan ei.
“Pa e motibu ei mes, nos a urgí e islanan pa nan sòru pa den futuro kuentanan anual ta kla na tempu. Originalmente a pone 1 di aprel komo fecha pa esei sosodé, pero e no tabata un fecha alkansabel. Awor aki nos a fiha 1 di yüli pa esei tuma lugá”, Weitenberg a bisa.
El a bisa, ku ya kaba ta papiando di presupuesto 2009 pa esei tambe ta na kla na tempu. “Mi ta kere ku ta na su lugá apuntá aki, ku ta na benefisio di e islanan mes pa esei sosodé”, el a agregá.
“Esaki ta importante tambe pa determiná ken ta bai karga ku e défisitnan korespondiente”, segun e presidente di Kolegio pa Supervishon Finansiero a sigui bisa.
Ta un hecho ku Ulanda a indiká klaramente di ke sostené e islanan aki finansieramente, inkluso ku eventual défisit. Pa loke ta e défisitnan di e aña aki i e añanan benidero esei no ta parse un problema. Pa loke ta e dos añanan promé, esta 2006 i 2007 mester wak esaki ainda. Semper mi tabatin e impreshon sinembargo, ku si ta trata di défisitnan aseptabel, Ulanda lo kubri esakinan, el a indiká.
Manera ta konosí, Ulanda a bai di akuerdo pa sanea debe di Antia manera e tabata te ku desèmber 2005. Pero kuantu e montante finalmente lo bira i kiko ta pasa ku e debe despues di 2005 te na momentu ku e proseso di desmantelashon di Antia ta un hecho, ainda no ta masha kla.
“Nos ta spera ku mas pronto posibel lo bin klaridat riba e punto aki, di manera ku nos por traha mas efisiente pa yega na presupuestonan balansá pa e tres islanan di Antia,” Weitenberg a bisa.
Weitenberg a anunsiá den mesun rosea ku ta intenshon di Kolegio pa Supervishon Finansiero pa emití un konseho tambe pa tantu Kòrsou komo St. Maarten riba nan presupuesto di 2008.
“Esaki”, segun Weitenberg, “lo sosodé riba petishon di e islanan mas, ku ainda no tin un akuerdo ku Ulanda riba supervishon finansiero, manera esei lo mester eksistí den e relashon estatal nobo”.