AMSTERDAM/ WILLEMSTAD - E agensia di notisia ANP mester paga Hans Melchers, tata di Claudia Melchers kende a bira víktima di sekuestro na 2005 un montante di 10 mil euro daño perhuisio pa publikashon ku el a hasi, insinuando ku e famia lo ta metí den trafikashon di droga. Ademas ANP mester pone un rektifikashon den e korant De Telegraaf.
Esei ta resultado di un kaso den korte di apelashon ku Hans Melchers a entamá kontra e agensia di notisia.
Na sèptèmber 2005, un grupo di yu di Kòrsou, Lorenzo Moenir Alam, Izaan Moenir Alam, Patricio Wawoe, Quentin Woi-Long-Sing, ku koperashon di Rouellar Rog a sekuestrá Claudia Melchers, yu muhé di e komersiante magnate Hans Melchers.
Loke tabata notabel den e kaso aki tabata e hecho, ku e sekuestradornan – kontrali na loke ta kustumber – no a pidi un suma di reskate, pero a pidi un reskate den forma di 300 kilo di kokaina.
E kaso manera nos a relatá ampliamente den pasado kaba, a finalisá ku detenshon di tur esnan kulpabel, sin ku famia Melchers a kumpli ku e reskate.
ANP a publiká un artíkulo dia 15 di sèptèmber 2005 ku e kabes: “Sekuestro di Melchers kasi sigur ta trafikashon den droga”.
Hans Melchers mesora a entamá un kaso den korte kontra ANP pasobra el a konsiderá ku e artíkulo a daña su bon nòmber i reputashon.
Korte den promé instansia na Amsterdam a konsiderá anteriormente ku e publikashon no tabata ofensivo i ku e tabata kompletamente legal.
Korte di Apelashon awor klaramente a indiká ku e ta pensa otro.
T’asina ku ANP a traha e artíkulo, basa riba dos fuente den seno di Kuerpo Polisial kendenan a bisa ku e eksigensia di e sekuestradornan di Claudia Melchers pa 300 kilo di kokaina kasi sigur tin di aber ku e hecho ku famia Melchers ta metí den trafikashon di droga.
Den e artíkulo a ser menshoná tambe ku e dos fuentenan aki a saka e mesun konklushon.
Korte di apelashon ta haña sinembargo ku e formulashon “Esei ta loke fuentenan den kuerpo polisial ku ta traha riba kombatimentu di trafikashon di droga” komo no sufisiente.
ANP a sita e fuentenan ku a bisa esaki, si tuma distansia di loke nan a deklará. Ku esaki nan a krea e impreshon ku famia Melchers mes tambe ta enbolbí den trafikashon di droga, ku ta algu ku ta mishi ku reputashon i bon nòmber di famia Melchers, asina korte ta konkluí.
Melchers a pidi, banda di un rektifikashon, un montante di 100 mil euro pa daño imaterial ku el a sufri i tambe un montante pa su daño material.
Korte sinembargo a bai di akuerdo ku un montante di 10 mil euro pa daño imaterial i por lo demas a rechasá e otro eksigensianan di Hans Melchers.