WILLEMSTAD - Hero Brinkman, miembro di Partij voor de Vrijheid den Tweede Kamer ta haña ku Ulanda no mester paga e debe nashonal di Antia ku ta suma e montante di komo 5 mil mion florin. Promé ku Ulanda saka un sèn pretu, mester tin garantia ku no tin korupshon mas den mundu polítiko riba e islanan aki.
Brinkman, ku a hasi e komentario aki den un entrevista na Radio Nederland Wereldomroep a splika ku tin kos ku ta masha lógiko, pero ku aparentemente polítikonan di Antia no ke komprondé.
E pagadó di belasting ulandes, no ta sinta ta warda pa usa su plaka ku el a traha duru p’e pa paga debe di un pais manera Antia. De fakto, bo por konsider’é komo un premiashon pa mal maneho, pa maneho di korupshon, Brinkman a bisa.
E miembro di PVV a splika ku e ta masha konsiente di loke ela yama e “realidat polítiko” na Ulanda, indikando ku e sa ku su partido no tin masha influensia den e proseso demokrátiko di tumamentu di desishon. PVV manera ta konosí ta un parti ku masha tiki asiento den Tweede Kamer i komo tal, e no ta forma parti di koalishon tampoko.
Mi no por bringa e asuntu di korupshon aki mediante poder polítiko, ta p’esei mes mi ta purba di pone preshon di e forma aki, Brinkman a bisa, referiendo na su deklarashonnan ofensivo kontra polítikonan di Antia.
Partij voor de Vrijheid a informá for di basta siman pasá kaba ku e ta bin ku un informe ofisial di aktonan di korupshon riba e islanan di Antia, un informe ku mester keda kla den transkurso di e luna aki.
“Mi a haña hopi informashon: di polítikonan mes di Antia, di organisashonnan no gubernamental, di partidonan polítiko i asta di un periodista mi a haña informashon balioso. Lo mi kita masker di hopi hende,” Brinkman a menasá.
Brinkman no tabata niun tiki kontentu tampoko ku e hecho ku su kolega Wilibrord van Beek tabata dispuesto pa sinta na mesa ku Pedro Atacho pa – den kuadro di Presidio – papia riba e asuntu di regla di komportashon durante e enkuentro parlamentario.
Kiko e ta bai hasi, si e enkuentro definitivamente tuma lugá tòg (manera tur kos ta indiká te na e momentunan aki) no ta masha kla.
Un kos ta parse sigur: Brinkman lo no keda sin asistí. El a bisa ku semper e tabata kier a bai un debate ku polítikonan antiano.
Den e sentido ei el a asta lamentá ku e POK di febrüari último no a sigui, pasobra el a pèrdè un bon oportunidat pa debatí ku parlamentarionan antiano i rubiano.